[新聞] 懷孕7個月仲着高踭鞋 巨肚黎姿凸臍出巡



《銅鑼灣》

40歲嘅黎姿自兩年前幫老公馬廷強生咗對孖女後，一直好想追個仔幫馬家繼後香燈，4月終於宣佈懷孕成功。大前晚8點，黎姿挺住約7個月巨肚，喺助手陪同下現身銅鑼灣時代廣場，佢着住灰色及膝裙襯白色長外套，巨肚將佢條大肚裙撐到緊一緊，連肚臍都凸到現晒形。不過最難得係佢雙腿又瘦又長，完全冇大肚婆嘅腳腫情況，果然得天獨厚。

暗示陀單B

黎姿雖然挺住巨肚，但佢仍然貪靚着吋半高踭鞋，而為咗小心保護胎兒，佢喺人多地方都戴住口罩，但見到記者就即刻除罩以靚樣見人。佢喺連卡佛睇化妝品同護膚品行咗幾分鐘，保母車就嚟接走佢，黎姿好小心落樓梯，由助手扶上車。

之前有指黎姿懷孖仔，不過佢喺微博暗示陀一個BB，仲上載兩張小木枱，並留言：「早前收到一份很有心思的禮物給兩個女兒！很喜歡！但要趕快托朋友多造一張給肚內的小寶貝，免得小器！」

採訪、攝影：吳耀輝

(蘋果日報)
http://www.ihktv.com/7-months-pregnant-gigi-patrol.html