場地及食物提供：東海薈 文：余潤娟 圖：譚志光
過年過節盆菜不少得，黎耀祥相約家姐、哥哥在家中歎盆菜，他覺得一家人圍埋，邊飲酒邊傾偈特別有氣氛。而且盆菜的餸菜好豐富，有魚有肉，花蝦、蠔鼓、髮菜、豬手、冬菇、瑤柱等過年好意頭食材樣樣齊，還送埋迷你湯圓及薑茶，主菜及甜品也照顧周到，即使十多人也夠食，祥仔大叫抵食，即時預定了兩盆。
親手整盆菜
盆菜材料非常豐富，祥仔逐一將豬手、豬皮、蘿蔔、芋頭芽菇、臘腸、馬蹄、雞鴨及支竹等鋪在底層，之後小心將豬脷、髮菜、蠔鼓、瑤柱、冬菇、蓮藕、扣肉、花蝦及鯪魚鋪上面，加料翻熱便可以享用。祥仔給大家一個小貼士，如果人多可以煲個靚湯，或加些蔬菜，一家人團聚夠晒熱鬧！
努力靠自己
祥仔由年頭忙到年尾，看他愈忙愈起勁，4、5年前他入住風水屋後便奪得「最佳男配角」，之後更行大運，視帝攞足3年，可謂風生水起。祥仔說：「不是甚麼風生水起，順順利利啦！其實搬入去時師傅問我想不想攞獎？我話不想，最想身體健康，根本沒有擺甚麼風水陣。師傅成日講，命好運好自然會搵到啱自己的屋，風水師只是鼓油，如果海鮮不夠新鮮，就算靚鼓油也帶不出鮮味，說到底要靠自己努力，不可以坐定粒六等運到。」
過年照開工
祥仔絕對不是等運到的人，他對自己工作是百分百投入，農曆年有3天假期早已排滿工作。他透露除了為上海衛視做春晚節目外，年初二會返內地表演，初三為賀歲賽馬活動做嘉賓，認真財源滾滾來。他3度奪視帝後宣布調整薪酬，問他的利是錢又會否加碼？祥仔笑笑口說：「都會，新年最緊要大家開開心心！」
新年新展望，祥仔希望拍好《巾幗梟雄Ⅲ》劇集，這部劇是李添勝的心血，他不想做衰添哥的作品，況且今次他有新拍檔胡杏兒，他坦言對這部劇好大期望，為超越前兩輯的成績，他會挑戰自己的能力，務求演技上有新突破。
 |
祥仔親手砌盆菜，將年藕和冬菇慢慢放下。
|
 |
祥仔展示盆菜中的蠔鼓相當肥美。
|
 |
祥仔最後在盆菜上放上鯪魚便大功告成。
|
 |
黎耀祥向讀者拜個早年。
|
 |
黎耀祥祝大家在蛇年都搵個盤滿缽滿。
|
 |
盆菜所用的材料十分豐富。
|
(星島日報)
沒有留言:
張貼留言