【明報專訊】無綫台慶頒獎禮逼近，大家又談論今年視帝視后誰屬。視帝方面，目前張智霖、陳豪最受吹捧，3屆視帝黎耀祥以一貫平常心迎戰。祥仔今年有《神探高倫布》及《法外風雲》參賽，不過前者劣評如潮，祥仔也直言：「這部一定冇啦！」《高倫布》失利，讓祥仔當頭棒喝，上了寶貴一課，他唯有寄望《法外風雲》。
◆祥：黎耀祥 ◆大：大姐大
大：視帝之爭又殺到，你已攞了3屆，有無信心再冧莊？覺得誰是勁敵？
祥：再畀獎我當然開心，但一直以來抱的心態是從不靠獎項來肯定自己，我的價值觀不是定在別人處，只會努力做好每項工作，况且一部劇集好，不代表下一部戲的角色處理得好，需要不斷檢討改善。今年視帝我覺得張智霖、陳豪、吳鎮宇機會都好大，特別是鎮宇的超班演出，好有魅力。
睇好吳鎮宇封帝
大：《神探高倫布》播出前備受期待，播出後卻劣評如潮，對你是否一種挫敗？
祥：我覺得是當頭棒喝，講衰啲，我都被讚了好耐，我都有演得不好的時候，或者我演出的戲非觀眾預期的好。《高倫布》播出前我有一段時間無劇推出，觀眾有所期待，節目巡禮時此劇予人懷舊偵探片的感覺，但出來是科幻片，變出兩個超人，正如觀眾想睇喜劇，卻原來是悲劇，是期望的落差問題。這次經驗，令我考慮演出時如何評估觀眾的期望，劇情如何安排能合理，始終拍戲會有些盲點，要多角度思考，不是一廂情願以為OK，我從中學習到好多。
與陳豪伍詠薇擦出火花
大：《法外風雲》回歸正常路線，觀眾對你的評價不錯，你與陳豪、伍詠薇都好有默契。
祥：今次拍得好開心，陳豪有獨有的鬼佬節奏和幽默感，好有火花。我和伍姑娘以前在電影合作過好多次，她是好爽直的人，演對手戲好舒服，可以放到盡及有親切感，她多年來都無改變，keep得好，依然咁靚，相對我就老了好多，這幾年似做了20年的工作。早前重看2008年《秀才愛上兵》，那時好後生，現在就好殘，真係大鑊。入行20幾年，原來我未試過請假去旅行，今年暑假是第一次。之前無劇拍都有好多登台、電影或出席活動的工作，今年中拍竣《巾幗梟雄之諜血長天》之後，難得有兩個月空檔，和妻兒去了10日旅行，是我首次一家人去旅行，感覺真是美妙到不得了，找回我的人生，醒覺自己原來錯失好多。不過以前做二三線時沒有安全感，你不做的話，有其他人可以代替，故沒心情放假，從來不敢走開；現在自己有點市場價值先夠膽唞一下，走開一次下次別人都會再搵你。看着兒子日漸長大，更要珍惜相處時間，希望將來回望人生，除了演戲之外，並非一無所有。
甘為角色練大隻
大：見你在《法外風雲》打泰拳，本身有無學過？
祥：無，以前學過空手道，又會在屋企學李小龍、成龍打功夫，現在年紀大，懶惰了，沒有以前的鬥心。
大：如果有套戲要你好似張家輝練到一身健碩肌肉，是否接受？
祥：家輝真的好犀利，好佩服他的恆心。如果有這個角色需要，我都想嘗試，演員最有趣是可改變自己，經歷不同角色的人生，從操練過程中去鞏固角色。不過我練都不會像張家輝的筋肉人般誇張，少少胸肌、腹肌已OK，依照現在的體型加強線條。之前放假食肥了好多，我都要努力減磅及注意飲食。
 |
| 黎耀祥有獎當然開心，但他會以平常心看待視帝獎項。 |
 |
| 黎耀祥早前趁空閒與太太及兒子去旅行，尋回家庭生活。 |
(明報)
沒有留言:
張貼留言