黎姿（GiGi）自二○○八年嫁給富豪馬廷強後，隨即息影相夫教女，肚皮密密開工，二人世界變五口之家，黎姿的一對孖女馬家蔚（Pricia）和馬家鎂（Gianna）轉眼已四歲多，幼女Pegella都兩歲了，三名囡囡為馬家帶來不少歡笑。昨日周六家庭日，本報讀者任小姐透過「爆相爆片」全程直擊黎姿出動在中環太子大廈的Sevva嘆下午茶，同場還撞見容祖兒。
一紅一白相輝映
黎姿和老公馬廷強不時被拍到在Sevva開餐，昨午全家又出動，據讀者任小姐報料，她昨午三時許看到祖兒跟女友人來嘆茶，大約半小時後就見到黎姿和工人湊着一對孖女到來，眼利的黎姿步入時先跟祖兒打招呼，其後黎姿和孖女等走到另一枱會合一對外籍男女友人，黎姿先安頓工人照顧孖女，家蔚和家鎂穿着同款的花裙，活潑可愛，兩姊妹又黐着外籍友人傾偈，關係熟絡，大約半小時後，撐着枴杖的馬廷強獨自前來，緊接另一名工人也抱着幼女Pegella出現。
黎姿一家分批到齊，她便獨自走到祖兒那邊閒聊，穿上最新的NikeLab X Sacai桃紅運動裝的祖兒與白色外套襯牛仔褲的黎姿頓成餐廳焦點，祖兒還跟了黎姿過枱打招呼。祖兒逐一與馬廷強和外籍朋友握手寒暄，其後更放下天后身份，半踎半跪撩孖女玩。紮着馬尾的孖女，十分可愛，連祖兒都主動逗玩，孖女跟祖兒有傾有講，並不害羞，祖兒陪小朋友玩了一輪才返回座位。
孖女五官精緻，跟媽咪黎姿長得餅印一樣，孖女雖然邊吃邊玩，但舉止嬌俏又斯文，由於妹妹Pegella年紀較細，所以全程由工人抱着，貼身照顧。
三工人湊三千金
黎姿分身照顧女兒，她約逗留了半小時，先行離開，不一會就輪到三名工人先後帶着三名囡囡離開，估計是前後腳落樓，低調行事避開耳目，馬廷強則殿後陪外籍友人繼續傾偈。
此外，祖兒昨日難得休息約友high tea，心情爽爆，在餐廳食飽後，她還在Instagram貼出一條慢跑短片，穿上紅衣紅裙襯波鞋的她，不顧儀態在餐廳外露台位置跑步，鬼馬又搞笑，她還留言：「好趕時間呀！」到晚上七時左右才與友人離開，更特別叫司機於中環文華東方酒店接載，其間她再次慢跑上車，表現風騷。
採訪：楊定
(蘋果日報)
沒有留言:
張貼留言