 |
| 就快可以睇到四蟹被掟落街嘅情節，只可惜方家受難時間太長........ |
神劇《大時代》今個星期來到結局周，雖然各主角的結局觀眾都心裏有數，但大家依然引頸以待，神劇的吸引力就在此。當年居中策劃的大監製韋家輝為我們作最後的大解構，不老的周慧敏到今時今日仍然是慳妹不二之選。
1.林保怡：今年2015年，點解當年搵我做陳滔滔角色呢，請回答。
韋：林保怡先生太耐嘅事真係唔記得，除咗天意我相信好嘅演員自然有人搵。
2.艾威：假如當年《大時代》收視理想，你會唔會留番係TVB？
韋：人係唔同時間應該有唔同嘅嘗試，好多都係上天安排好。
3.黃智亨：好想知當年鄭少秋佢接咗丁蟹嘅角色嘅反應，係興奮定藐嘴？
韋：秋官係一個好出色嘅演員，任何角色都可以應付自如，丁蟹嘅角色當然唔例外，演得好出色。作為一位咁專業演員遇到有挑戰角色，應該係急不及待去試。
4.郭子健：敏敏（楊羚飾演）嘅醜事俾人貼通街之後，羞愧跳樓自殺、丁蟹定罪之後，丁家搵人掟晒方家啲人落樓死剩方展博呢兩幕最後都因為敏感冇出到街。想知除咗呢兩場之外，仲有冇其他場口係拍咗冇出街呢？
韋：當時好想拍跳樓同掟人落街嘅情節，所以第一集已經有五蟹跳樓嘅戲。記憶中應該冇其他鏡頭冇出街。
5.周秀娜：再拍《大時代》電影版嘅話，你覺得我啱唔啱做慳妹呢個角色？
韋：好多謝周秀娜小姐咁鍾意慳妹個角色，如果真係拍，周慧敏個樣都冇變，好啱，或者佢會駕輕就熟啲。
6.杜琪峯：《大時代》嘅成就代表香港歷史文化同香港電視光輝一頁，韋家輝係咪真係拍電影版呀？
韋：杜Sir，不如我問返你，你拍我咪拍囉。
7.陶大宇：韋家輝先生好耐冇見呀，你知唔知我係邊個？我係大宇即係丁蟹個仔丁益蟹，點解當初搵我做嘅？聽講本來係艾威做，點解最後搵咗我做？
韋：陶大宇先生你好，你之後都拍咗好多出色劇集。咁多年前嘅嘢都真係唔記得，不過應該係天意安排。
8.唐寧：你寫呢套戲非常刺激，角色好兇狠，慘嘅好慘，惡嘅好惡。我睇番都覺得唞唔到氣，到底你寫嘅時候會唔會寫到唔忍心或者你都會覺得唞唔到氣？
韋：套劇其實係集體創作，好多幕後手足都有參與，曾謹昌先生亦有好多好提議，我將一啲經歷同想拍嘅情節加咗入去。要寫好一個古仔，創作人投入同代入創作好緊要，希望答到你嘅問題。
9.曾謹昌：當年度《大時代》大家日以繼夜半年返屋企嘅次數都係4、5次咁多，嗰時見你枱頭有個樽仔載住粒藥丸，好想知嗰粒係乜嘢藥？係咪搞唔掂時用嚟啪咗佢？
韋：曾謹昌先生你記性真好，應該仲好過我，因為我都冇乜印象，多謝你提起。
10.吳詠紅：韋生戲裏面我做方芳，除咗呢個角色你覺得我仲會啱邊個角色？
韋：吳詠紅小姐你演嘅方芳好出色，我相信劇中好多角色你都可以勝任。
(蘋果日報)
http://hk.apple.nextmedia.com/enews/realtime/20150607/53827275
沒有留言:
張貼留言