事業：好驚討厭份工
向外闖對阿佘而言，除了可以與不同的演員擦出新火花，還有一份未知的刺激。
喺無綫十三年，除咗得到名與利之外，最重要係令我搵到一份自己鍾意嘅工作，真正可以寓工作於娛樂，寓娛樂於工作，因為好多人都唔鍾意自己份工，我可以搵到覺得好幸福，而且不停畀到新鮮感我，令我愈做愈有興趣，慢慢愛上呢份工。
外闖感到刺激
其實今次唔續約都掙扎咗一年多，係慢慢發覺唔妥，喺度原地踏步冇得前行，係有工作但硬係覺得冇目標，咁樣唔得，我大部分時間喺工作上，點可以冇目標呢！冇動力去拍戲已經唔得啦！我就諗要想辦法或者要啲衝擊，試吓同唔同嘅人合作先至會有火花，而且做人咩都要試吓，唔能夠一成不變。
咁多年無綫係保護得我好好，不過向外闖都冇令我不安，反而覺得刺激，因為一切都係未知，喺無綫咁多年跟住條路係咁走，好安全嘅行人路走，但出到去可能係喺馬路行，有危險，但有危先有機，所以覺得好刺激、好期待。
合作過冇火花
我希望可以繼續鍾意自己嘅工作，亦唔會畀太大壓力自己要攞啲咩成績，我嘅目的只係唔想討厭自己份工，如果喺無綫一直拍落去，可能好多對手已合作過，同一個人拍好多次，冇乜火花，喺個迴旋處轉轉轉咁，我好驚有一日會討厭自己份工。
我唔續約冇唔捨得，因為我真係唔覺得離開囉！唔係親生？但我真係冇覺得自己離開，真係冇分別，亦未必會少幫無綫拍劇，只要遇到好劇本，又有人搵我咪拍囉，唔係親生好嘢唔預我？希望唔好咁對我啦！
愛情：煮到埋嚟就食
阿佘敢愛，只要遇到理想對象，會不計較對方身份、工作，全情投入。
日後拍戲，都會盡量唔拍咁辛苦，咁多年冇捱壞係冇可能嘅，肝呀眼呀都一定唔好，不過有時遇到好劇本、好對手好難唔拍，所以依家理想係唔好拍咁辛苦，放吓假，喺每套戲中間都有得休息一陣至再開工，等準備工作可以做好啲。
感情嘅嘢順其自然啦，唔係買衫、買寵物嘛。雖然話大陸接觸人多啲，但真係冇諗，講到大陸女星好多都同啲富二代，我之前夠有上大陸拍過劇啦，一個都遇唔到，都唔關事嘅，個天要你遇到就遇到。
有人錫會靚啲
好似郭羨妮遇到合適唔理身份都去馬？我都唔會理對方係咩人架，感情煮到嚟咪食囉，合眼緣、好人一個就得，我又唔恨嫁，朋友中失敗嘅例子唔少，自己嘅命運係點真係唔知，不過有得拍拖就好啲，大部分拍拖都應該係開心嘅，有人錫，人都靚啲啦！呢排靚唔靚？我都幾靚架，日日都靚！
接班人 五個鬥跑出
我走咗邊個係一姐接班人？嘩！我點敢當呀！大家平起平坐啫！以我之見，一個花旦受歡迎，最緊要係宜古宜今。好幾個都好好吖……楊怡亦正亦邪，亦都係宜古宜今；陳法拉就好有觀眾緣，佢已經先拔頭籌啦；雖然我冇同徐子珊合作過，但知道佢係個好聰明嘅女仔，亦都好多元化；鍾嘉欣係小家碧玉型，各方面嘅畀人好正面嘅感覺，亦都好有觀眾緣；胡杏兒就非常勤力，不斷增值自己求變。嘻嘻……佢哋各有所長啦！叮噹馬頭呀，我都想知邊個跑出囉！
文：影視組
攝：劉智源
髮型：Billy Choi@Hair Culture
化妝：江中平@A&V Make Up School
服裝：Valentino
場地：AZURE
 |
阿佘毅然北闖，為的是尋求演藝事業新衝擊。 |
 |
阿佘遇到合適的對象，會放下身段盡情去愛。 |
(東方日報)
http://orientaldaily.on.cc/cnt/entertainment/20110507/00282_029.html
沒有留言:
張貼留言