[忽然一週第823期] 吳卓羲爆缸都要靚



之後要喺塊面度搽血漿，佢亦要親自出手，怕化妝師太重手喎！



無綫今年重頭劇《法證先鋒 3》近排趕工，自稱喺劇入面，所有動作場面都吓吓打真軍嘅吳卓羲，前幾日就同徐子珊拍場炒車戲。話晒有爆破場面，嗰晚成村人聚集喺西貢大網仔，工作人員個個嚴陣以待，相反兩位主角就喺度歎慢版。

一直鏡不離手嘅吳卓羲，得閒就鍾意攞塊鏡出嚟照兩嘢。化血漿嗰陣，吳公子又唔肯假手於人，自己拎住塊鏡逐點逐點慢慢點上去，仲同化妝師講：「塊面唔使搽咁多啦！」慌死帥樣扣分。

至於拍檔徐子珊呢，一樣咁滋陰，明明冇落雨，都要助手擔定把遮以防萬一。到炒車之後，原本貼咗膠布嘅子珊，為防纖纖雙手受傷，佢又好仔細咁搵面前玻璃碎，然後逐粒逐粒執走先肯爬出嚟。經兩位大帝搞一搞，大隊凌晨四點先收工，媽咪姐亦終於可以搵周公囉！

雖然係拍炒車戲，但吳卓羲同徐子珊依然有講有笑，的確膽識過人。

臨 roll機前，吳卓羲仲要用倒後鏡照吓自己個靚樣，姿整過徐子珊。

等埋位時，徐子珊要助手幫手擔遮。其實當時又冇雨，到底遮乜呢？

劇情要徐子珊炒車後爬出車外，地下鋪咗啲假玻璃碎，但徐仍好小心咁將喺佢身前嘅玻璃碎執走。喂，天光喇！