KKground: [新聞] 黎耀祥：注定一世冇朋友

2011年10月21日星期五

[新聞] 黎耀祥：注定一世冇朋友

黎耀祥予人感覺好friendly，大家都以為他相識滿天下。原來這只是錯覺，祥仔反而是一個冇朋友的悶蛋。其實形象只是一種掩眼法，「我呢類孤僻嘅人，注定一世冇朋友！」這也講得對，既然木秀於林，又何必假惺惺同人扮friend？

老實講，我真係唔叻交朋友，又係一個唔太需要朋友嘅人。黎耀祥可以全日唔出街，又唔鍾意同人聯絡，真係死咗都冇人知。喺呢個圈我有好多好同事，不過稱得上朋友就真係冇邊幾個，我呢類孤僻嘅人，注定一世冇朋友！

至叻背唐詩

我鍾意一個人獨處，由細到大都係，o靚仔嗰陣冇嘢玩，咪同阿哥鬥背唐詩三百首囉，記得第一首背嘅係李白《將進酒》，唔使十五分鐘就背好，嚇我阿哥一跳。所以長大後都鍾意一個人睇書，書可能就係我最好朋友。

但我畀人嘅感覺好住家男人、好friendly，事實卻剛好相反，呢種感覺好得意，我唔係呃人扮friend，可能我知道點樣去尊重一個人，人哋就自然對我好，但骨子裏嘅我可是鍾意靜、唔鍾意湊熱鬧，我就係咁，咁先係一個真正嘅我。

青雲圈中友

喺朋友界，我一啲都唔活躍，最好嘅朋友只有一個form 1識到依家嘅死黨，到依家仲有出嚟食飯，自己都覺得好難得。然而，圈中朋友只得一兩個，就係青雲同一兩個導演咁大把，不過我哋唔會有定期聚會，只要心血來潮想食飯，咪出嚟囉，唔會搞大聚會，係呀！我就係咁享受悶。

所以要形容黎耀祥真係難，佢唔識面對人際關係，但人際關係又唔錯，可能我天生人緣好啦！哈哈！（完）

後記

蟬聯兩屆視帝的祥仔真係好忙，這個訪問一波幾十折，小記每問到入肉時，祥仔電話總是在響，原來不只是周杰倫牛仔很忙，視帝祥仔亦被電話瘋狂轟炸，只能嘆一句木秀於林，「phone」必「催」之，你話喇，自命冇朋友的他忙不忙？

口述：黎耀祥筆錄：專案組