[新聞] 回巢要求多激嬲高層 《巾幗梟雄3》 踢走鄧萃雯

無綫為了明年香港免費電視牌照的一場埋身戰安排連串秘密武器，除打友情牌，搵來王晶和曾志偉幫忙力邀葉德嫻和劉德華回巢拍劇外，又成功說服金牌監製李添勝高薪留任，「金牌編審」張華標強勢回歸籌拍劇王《巾幗梟雄3》。《巾幗》系列「柴九哥」黎耀祥是標記，《巾幗3》當然有預埋他，唯獨重點人物之一的「四奶奶」鄧萃雯，卻因為合約問題，加上恃住名利雙收要求多多，吊起嚟賣，觸怒了無綫戲劇製作總監曾勵珍慘遭被飛，取而代之的是失戀視后胡杏兒，怪不得之前李添勝回應傳媒時說：「我明年3月係開劇，有預黎耀祥，但冇鄧萃雯！」
黎耀祥、鄧萃雯憑兩部《巾幗梟雄》兩奪視帝、視后，非常強橫。最近無綫在深夜時段重播《巾幗梟雄》，OL上班族寧可晚晚捱眼瞓亦要追看，劇力仍然驚人，《巾幗》系列長拍長收，只可惜，《巾幗梟雄3》兩人不能結戲緣，未能打破三度問鼎視帝、視后的神話。

雯女要求多

「無綫唔係唔想用雯女，只不過係佢太寸咀啦，恃住兩大王牌劇《金枝慾孽》同《巾幗梟雄》食到糊，大陸劇源源不絕，魔童王維基又以3倍價錢挖角，以為被捧上天，就可以要求多多，吊起嚟賣。其實去年拍完《金枝慾孽2》之後，佢同無綫經已冇晒部頭合約，無綫多次想同佢傾約，點知佢經理人放晒聲氣，話雯女今非昔比，佢忙於大陸拍劇搵人仔，唔係大劇，冇靚位，冇獎拎係唔會返歸，不過，開拍《巾幗》系列就唔同，但佢一定要求添哥做監製，仲要指定編劇……高層曾勵珍把鬼火，下旨決定將佢飛起，益自己友，兼且聽教聽話嘅胡杏兒好過，所以《巾幗3》初步擬定的演員名單無鄧萃雯，反而有珍姐愛將，連中3元嘅『必文』敖嘉年做第2男主角。無原班人馬，《巾幗3》一定會同1、2輯完全唔同，會用全新人物、背景拍攝。」知情者爆料說。

祥仔無失望

對於能否同老拍檔鄧萃雯再續戲緣，黎耀祥有所保留話：「依家講明年2月嘅事，言之尚早啦，都唔知咩環境，又唔知劇本係點，唯一可以講，杏兒同雯女都係好演員，如果添哥換杏兒，可能覺得角色適合佢啫！（會唔會失望？）又唔會，又唔可以合作一世嘅，要拍下其他人，好似《巾幗梟雄之義海豪情》都同好多新演員合作，我冇乜所謂。」至於李添勝則覺得：「我哋要突破框框，唔可以睇來睇去嗰幾個，所以都會加入新人演出。」

(星島日報)
http://www.ihktv.com/rosybusiness3-myolie.html