64歲的李添勝監製過無數受歡迎劇集，向來不喜爭名逐利的他，早年曾向無綫要求降職減人工，只求繼續製作觀眾喜歡的作品。
「我做人其實好簡單，少啲私心、多啲公道」，早年成功捧紅周潤發和劉德華等巨星的金牌監製李添勝，去年在台慶頒獎禮上領取萬千光輝演藝大獎時，一番肺腑之言，贏盡讚賞。曾經是電視上的經典小人物掃街茂，現實中卻被無綫中人視為大英雄。明晚推出的台慶劇《巾幗梟雄之義海豪情》，被添哥喻為歷年來最滿意作品，未播已來勢洶洶，男、女主角黎耀祥和鄧萃雯被指是視帝視后大熱，年底台慶頒獎禮的最佳劇集獎，更誓成添哥囊中物，造就他的最後勝利。
現年 64歲的李添勝，原本三年前已打算退休，結果在無綫總經理陳志雲及多位高層連番游說下，一而再、再而三地留低。接受本報記者專訪當日，添哥因膝蓋傷患步履蹣跚，他慨嘆近年體能大不如前，連 10多年來的跑步習慣也被迫停下。添哥說：「真係好想退落嚟，體能唔得，早幾年拍《楚漢驕雄》去無錫擒山，後生嗰班都唔夠我嚟，但幾年之後已經唔係嗰種體能，家叫我返內地一次都支持唔住。」
見盡以權謀私之人
本來明日播放的《巾幗梟雄之義海豪情》是添哥入行 41年的封刀之作，結果他近日又被游說續約一年。添哥自言並非賣花讚花香，他指歷年來最感滿意的作品，不是周潤發和鄭裕玲主演的《網中人》，也不是梁朝偉和劉德華主演的《鹿鼎記》，而是黎耀祥與鄧萃雯今次孭飛的《義海豪情》。添哥說：「呢部係編審張華標離開 TVB前最後一部，我亦諗住拍埋《義海》之後退休，所以大家都踩行油去做。《義海》係我咁多年嚟最滿意嘅一部，因為某程度上係有突破，我拋開曬過往素材，每一個情節大家唔會覺得熟口熟面。套劇經歷國民政府、日治時期同國共內戰三個大時代，一班小人物處身大時代，我就唔需要諗番以前做來做去嗰啲謀咗人哋幾多股份，搶人公司，跟住人哋發奮搶番返嚟，又或者 A愛 B， B愛 C， C又愛 A，我完全丟曬呢啲嘢。」
數《義海》最搶最出位角色，添哥預告是飾演黎耀祥上司、其後淪為漢奸的麥長青（麥包），他說：「成個劇最仆街係佢，個角色真係好 PK。《巾幗梟雄》有敖嘉年，《鐵馬尋橋》有林嘉華，今次麥長青比佢哋兩個更 PK。」
去年添哥領取萬千光輝演藝大獎時，在《萬千星輝頒獎典禮》上對着全港觀眾及無綫高層說：「我做人其實好簡單，少啲私心、多啲公道。」大快人心。添哥指當晚全因毫無心理準備，純粹衝口而出，他說：「佢哋（ TVB）保密過咗龍，可能因為咁，冇任何準備下個心諗到乜就講乜。保密保到咁真係唔啱，大概半小時前都喺我耳邊單聲吖，等我思緒整理一下，唔使搞到咁混亂，亂曬大龍。」
衝口而出的往往是真心話，添哥未有否認，他說：「咁多年嚟，難免睇到一啲人唔係企喺公司立場，而係成日企喺自己立場，咁問題咪多。有時明明啱嘅嘢，講講嚇變咗唔啱，變咗你自己啱，顛倒黑白是非。」可會路見不平，拔刀相助？他說：「睇情況，應該出聲就出聲，但出咗聲冇幫助就最好避免越搞越禍。」
轟抄襲自己攞嚟衰
過去 10多年來，本地電視劇質素每下愈況，添哥認為要提升電視劇質素，有必要認真培育一班幕後創作人才，他說：「創作呢樣嘢不進則退，套套搞埋啲四角戀三角戀，突破唔到，俾人覺得陳腔濫調。舊嗰班好多走咗，新嗰班接觸嘅科技多到不得了，但固有人情根基好少，因為人與人之間距離大咗，一部電腦可以聯絡好多人，但嗰個人真性情係點佢未必知，佢哋好似活喺一個虛擬世界，所知嘅嘢往往喺電腦或者睇書得番嚟，唔似得以前啲劇中人物個個有血有肉，家好多時得番個殼。所以啲人成日話啲劇冇以前咁好睇係有原因，負責創作嗰班，接觸真實人物比較少，家左鄰右里姓乜名乜都唔知啦，咁又點知人物性格係點？所以資源多少未必係成敗命脈，反而係睇劇本搞得好唔好，大有大做小有小做，唔會連個譜都冇埋。劇本唔好，使幾多錢都係嘥。」
陳腔濫調之餘，近年香港劇集也連番被轟抄襲，添哥直指此行為不智，他說：「抄人哋精神，情節上可以完全唔同，《阿凡達》（ Avatar）都有個精神喺度，話人類掠奪人哋嘅資源。最不智係連佈景都抄埋，認真無聊，抄嚟做乜？抄人情節係冇意義，人哋社會文化背景同香港根本完全唔同。我覺得抄精神冇壞，好似個劇以環保為中心咁，家全世界都講緊環保，你話我抄邊個？唔通你講得我唔講得？但故事橋段都抄埋，就自己攞嚟衰。」
昔日添哥拍過無數改編自金庸小說的劇集，如《鹿鼎記》和《射鵰英雄傳》等，問到若無綫再次重拍，有哪幾位花旦小生適合演繹金庸筆下的經典人物時，添哥想了好一會才說：「呢個問題我都唔識答，如果公司叫我再拍《鹿鼎記》，我一定叫公司唔好拍，因為拍唔到，自己攞個醜字嚟寫，去邊度搵七個老婆？韋小寶又難搵，康熙又難搵，仲有索額圖呢？拍金庸小說， TVB家冇能力拍落去，因為冇演員，拍金庸唔係單靠班後生演員，係靠嗰啲掌門、武林大俠，個個 40幾 60幾歲有型有格，東邪西毒南帝北丐去邊度搵？搵班後生個個黐鬚畫到貓咁唔得 o架嘛！」
嘲港台拍劇嘆慢板
年前內地小生黃曉明主演的《鹿鼎記》，添哥自言也有留意，他說：「唔好睇，呢個係劇本問題，寫鹹濕韋小寶一定死，韋小寶唔係鹹濕，係衰鬼格。」添哥曾主演電視劇《為兩餐》， 70年代在《歡樂今宵》趣劇中扮演的掃街茂更深入人心。問他當年為何不索性做明星時，添哥笑說：「雖然自己五官端正，但天生條件矮，覺得自己唔適合，客串過嚇癮冇所謂，當年我都幫港台拍過，講起就火都滾埋，拍足一日拍得嗰 10幾個鏡頭，如果畀我拍，三粒鐘搞掂啦！」
添哥話當年
李添勝多年來捧紅過不少天王巨星，拍過不少為人稱道的劇集，在電視圈打滾多年，聽他話從前，比看電視劇還要精采。
杜琪峰隊雞精躁火
85年添哥監製的電視劇《楊家將》，齊集周潤發、鄭裕玲、梁朝偉、劉德華、張曼玉、汪明荃、劉嘉玲和萬梓良等猛人巨星，堪稱史上最強卡士劇集。粒粒皆巨星，會否最難搞？添哥笑說：「唔難搞，不過係辛苦，趕囉！ TVB當年團隊精神好好，一話打仗，公司一落命令話 10幾日後搞，就個個都返曬嚟。記得有場拍金沙灘嘅戲，我哋成車金沙撒落去龍蝦灣，拍完之後執到幾多得幾多，執唔到就算數，家實俾環保署拉啦。佢哋個個都喺呢度（ TVB）出去，個個返到嚟不知幾咁高興，化妝間嘈到不得了。杜琪峰當年負責拍廠，佢老婆買咗半打雞精畀佢飲，諗住飲一支就撐兩、三個鐘，點知佢越飲越躁，係人都鬧。」
萬梓良連累幕後人
91年萬梓良為無綫拍攝《大家族》期間，曾寫血衣「乞求雞毛司令賜廠期」向高層抗議廠期被 cut。據傳萬子所指的雞毛司令，正是當時負責管理廠期的添哥。添哥說：「大佬你諗嚇啦，人哋攝影、收音、燈光返輪班，一個禮拜休息一日，本來個廠最遲收凌晨 3點，執好曬嘢返到屋企都成 4、 5點，第日返下晝兩、三點，中間 6、 7個鐘頭瞓覺，你偶然一次 over到凌晨 5點冇所謂，但你餐餐都係咁，人哋第日點返工？
「工程部阿頭 cut佢廠係必然，就算係我，我都一樣叫 cut，冇可能咁 o架嘛，咪拍多一、兩日囉，又唔係唔畀你拍，做乜晚晚要咁？根本係佢自己搞唔清楚啲問題。佢話邊個都冇所謂，反正佢話邊個都冇人理佢。」
小八卦：冇出世紙的掃街茂
「死飛仔，開到咁快，趕住去攞出世紙咩！遲早撞瓜你個死飛仔」。這是李添勝 70年代在《歡樂今宵》中扮演掃街茂的經典金句，不過當年經常鬧人趕住攞出世紙的掃街茂，現實中原來沒有出世紙。添哥說：「原本我係冇名嘅，李添勝個名係小學校長幫我改。我係執媽接生，本來出世之後要報番曬啲資料，但我阿媽身體唔好，老竇又唔識字，又要返工，咁就一直冇理。後來執媽間留產所都執埋笠，乜嘢資料都查唔番。以前我通山走曬到黑麻麻，屋企人就叫我黑仔，到入學時阿媽就叫校長幫我改名。其實應該係留產所報番啲資料上去，隔咗好多年屋企人都唔去做呢樣嘢，真係好滑稽。」
======================================================
鄧萃雯忠奸兩面捏得準 黎耀祥二線小生擢升一哥
《巾幗梟雄》中的柴九令黎耀祥由二線小生一夜間坐上視帝寶座，柴九和黎耀祥的經歷確有頗微妙的相似。無綫推出「巾幗梟雄之義海豪情」，會是延續收視光輝，抑或狗尾續貂，留待觀眾自已品評，作為茶餘飯後吹水主題，亦一樂也。
我們特邀該劇監製李添勝、黎耀祥和鄧萃雯談談該劇的精髓。添哥說：「拍續集，全因為當時『巾幗梟雄』收視好，陳志雲下令『斬多四兩』，這『四兩』就是今日的『義海豪情』，但要原班人馬演出，在構思劇本上增加了難度。」
添哥表示不怕得罪講一句，鄧萃雯和黎耀祥已不年輕，角色人物的塑造要遷就他們，不像平時般，有了角色才配上演員。
收視就是壓力
「沒壓力是騙人的，但我已經退了休，現在是以合約形式做監製，壓力會比以前輕。」添哥他所說的壓力當然是收視，口碑是其次，收視才是一哥。
「巾」與「義」兩劇劇種完全不同，前者是家族為主幹的爭鬥，後者廣涉黑社會、毒禍和抗日題材，在角色演繹上，黎耀祥和鄧萃雯各有見解：
廢柴提升境界
黎耀祥：「巾」劇中的柴九本來是一無所有的鄉下人，原只希望兩餐一宿，遇到四奶奶這個伯樂，由被人笑是「廢柴」變成全劇的靈魂人物，全因為「拚死無大害」這五個字的信念，一個人如果覺得自己已經沒甚麼可以損失時，就會做出很多一般人不敢做的事。相反地，「義」劇中的劉醒有家顧累，最大的憂慮是家人，尤其是患病的妹妹，有情有義為他帶來重重劫難。
演繹忠奸準確
鄧萃雯：「巾」劇的四奶奶因報恩而嫁作四奶奶，在家，謝雪心飾演的大奶奶欲除之而後快，在外，要應付時刻敲詐漕運費的二奶奶兄長，為家族生意犧牲個人享樂。
「義」劇中的鄭九妹先在重男輕女的家庭奪權，後把民族榮辱、國家興亡使命擔上肩，由於表面上是毒販、漢奸，實則是救民於水火，在演繹忠奸兩面時要拿捏得準，比諸四奶奶角色，演繹鄭九妹的難度較高。
不少人以為「義海豪情」是抗日劇，李添勝表示這部其實是以抗日時代為背景，帶出毒禍訊息，例如日軍強迫農民種鴉片，而鄭九妹就是因為從小看見毒品的禍害，長大後決心打擊父親的鴉片生意，從而帶出民族衝突、兒女情仇的劇情。
(蘋果日報)
沒有留言:
張貼留言