[新聞] 黃宗澤：叫祥仔做師傅

黃宗澤（Bosco）與兩屆「視帝」黎耀祥原來有段師徒緣，兩人05年拍《強劍》時特別投契，自始Bosco就以師傅稱呼祥仔，每當角色遇到難題或想突破演技，Bosco都會向師傅請教。

我其實係冇正式讀過藝員訓練班，只係旁聽過幾堂，所以都係靠自己觀察，同埋前輩過料，同每個前輩合作都可以學到唔同嘅嘢。我第一套劇拍《衝上雲霄》，吳鎮宇都有過料畀我，佢屬於學院派，好多演戲理論嘅。拍《英雄．刀．少年》時，我喺松哥（劉松仁）身上就學到點樣安排啲戲。

《潛行狙擊》代表作

05年同黎耀祥拍《強劍》，嗰陣未埋位就捉住佢傾偈，請教佢做戲啲嘢，佢好肯過料畀我，久而久之我就叫咗佢做師傅，我到依家見到黎耀祥都叫佢做師傅，叫慣咗吖嘛。

遇到啲棘手角色諗唔通點做，開工撞到佢就會問，上次同今次角色好似喎，點算呢﹖點樣做出嚟有唔同呢？師傅就會同我一齊研究分析應該點樣做，加啲乜落去個角色等觀眾覺得有分別。

《潛行狙擊》跛Co個角色我都有同師傅傾，師傅都話呢個角色已經好好，要留心分清楚每個唔同階段就掂。《潛行狙擊》劇本的確寫得好好，係我近五、六年最鍾意嘅角色，但又唔係話度身訂造，有啲嘢係撞番嚟嘅，好似我同監製提議不如試吓留鬚爛撻撻啦，監製睇完又覺得幾好，觀眾又覺得OK。

最想師徒合演喜劇

諗落同祥仔私底下接觸唔多喎，佢都好忙，不過返公司撞到就好開心，大家講到雞啄唔斷，私事好少講，講吓拍戲、講吓車，男人都鍾意車。同祥仔合作《強劍》之後都再冇機會合作，有機會反而想同祥仔合作拍喜劇玩吓對手戲，對手好反應係好自然就做到出嚟。

黃宗澤與黎耀祥在《強劍》結緣。

(東方日報)
http://orientaldaily.on.cc/cnt/entertainment/20111102/00282_027.html