KKground: [新聞] 大姐大手記﹕李添勝點將讚唐詩詠馬賽寫包單《神探高倫布》好睇

【明報專訊】《神探高倫布》開播，有關評論不少，透過高清電視畫面玩「捉錯處」，就連香煙款式是否近年產物也看得清楚，觀眾落足眼力兼看得透徹，不得不Like！有「李添勝+黎耀祥」這個牌頭，大姐大總會有所期待，劇集播映前看到宣傳片的搞笑格局，多少有疑問，直接問添哥今次搞乜嘢？添哥以一貫風格，沒打官腔回應。「唔係搞笑㗎！你睇啦！劇集在第二個星期開始好睇，唐詩詠出場後好多嘢搞，我寫包單好好睇！」

《神探高倫布》加入「新成員」唐詩詠與馬賽，還有編審葉廣蔭。添哥與葉廣蔭20年前已合作，他監製的《大頭綠衣鬥殭屍》就是葉廣蔭擔任編審，演員包括錢小豪、鄭秀文與黎耀祥，《西遊記》、《老友鬼鬼》與《他來自天堂》也是葉廣蔭作品，《神探高倫布》的古靈精怪是有迹可尋。葉廣蔭後來離開無綫，今次回巢首齣劇就是跟添哥合作《神探高倫布》，還有拍攝中的《巾幗3》。

網上有不少有關葉廣蔭的討論，今時今日的觀眾睇電視，對幕後班底一樣有要求。原來葉廣蔭是張華標的徒弟，《巾幗》一、二輯是張華標作品，《巾幗3》則由徒弟接手，成績要等劇集播映才揭曉，暫時先睇《神探高倫布》。角色安排方面，「視帝祥」一時是戇直的高大喜，要跟包平安（敖嘉年飾）手拖手，小動作很搞鬼，不過高倫布現身時就變得聰明絕頂兼冷酷無情。這善變的極端性格要媽咪級觀眾了解是否有難度？大姐大要讚葉廣蔭，在第1、2集已將高大喜、高倫布寫得很清晰，不擔心媽咪觀眾睇唔明。

葉廣蔭在微博跟粉絲互動，親自解答劇集疑問，他事先聲明《神探高倫布》不是喜劇，也沒有重口味，唐詩詠的角色40歲仍美艷如花，因她在60年代到日本整容，他又透露唐詩詠在劇中遭強姦。

大姐大跟添哥提起唐詩詠與馬賽，問他是否有意安排祥仔「帶起」兩人，為花旦荒補充新血？添哥對唐詩詠很有信心：「呢個嘢得㗎！」唐詩詠一人分飾母女角色，除了有發揮，收場更會令觀眾好感動。馬賽也在添哥的「點將錄」，添哥說她的角色比唐詩詠更難演，但把握得很好。提到蕭正楠，添哥則讚他是能忠能奸的多面演員。

黎耀祥伸手入馬賽裙底捉，令人驚訝。

(明報)
http://ol.mingpao.com/cfm/star5.cfm?File=20130412/saa01/mcd1.txt
=====================================================================
電視撈飯：馬賽AV味任玩　速封BB

無綫新劇《神探高倫布》首周播映，好多觀眾都覺得極重口味，網民更睇到嘩嘩聲，話似十足AV！尤其馬賽飾演嘅伊娃成日俾人玩，網民由憐生愛，仲封埋佢做BB㖭！

前晚劇情講述黎耀祥飾演嘅高倫布，為咗向保安司個女馬賽施下馬威，出盡賤招玩伊人！佢先order啲𡃁將着短裙嘅馬賽BB掟落水，再呃佢入貨倉，仲放埋小強（蟑螂）嚇佢，其中一隻小強捐咗入佢裙底，祥仔扮晒及時出現，仲伸手入佢條裙底捉小強。當時馬賽BB都冇眼睇，喊驚咁嘅樣大嗌：「唔好呀！唔好呀！」不過祥仔照樣伸手入去捉小強，鏡頭仲要影住佢哋個樣，超重口味！另一幕講馬賽踩中釘，祥仔幫佢掹番出嚟，當時馬賽又係一副肉緊樣。

小強爬錯方向

對於俾網民封做BB，馬賽噚日接受電話訪問話好開心，仲承諾收視好會考慮着泳衣，佢話：「可以諗諗，一定要有驚喜！」講番小強捐入裙底，佢話諗番都打冷陣：「為咗消毒隻小強，我哋整暈或殺死咗好幾隻，有啲唔肯爬入裙底，最後拍咗成廿分鐘，啲表情入肉嘅體驗！」有網民話似AV情節，佢就叫大家唔好淨係睇嗰場喎。另外，通訊事務管理局周一至周三收到四宗投訴，指劇情唔合理、冇新意、抄襲同埋與歷史不符。無綫都接獲兩宗投訴，其中一個指祥仔眼神色情。