 |
| 昨日唐寧回憶91年只得9歲的自己，要爸爸媽媽交替陪着在片場拍《大時代》。 |
【狂煲大時代】1992年神劇《大時代》掀起翻煲熱潮，讀者對於劇情可能已滾瓜爛熟，但當中秘聞又知幾多？就如當年9歲的唐寧已感受過拍劇捱更抵夜滋味；益蟹原本由艾威飾演，最後一刻才改由陶大宇接上；至於，楊羚那幕跳樓自殺戲，當日真的拍了，可惜最終因太激而被刪剪。
撰文：馮國康、嵐山
唐寧要捱夜
邵仲衡透露拍《大時代》時，曾兩日兩夜不眠不休，原來一班童星為趕戲也要捱更抵夜。當年只得9歲、飾演童年方芳的唐寧昨日說：「啲通告都幾密㗎，因為要夾我哋成班細路仔放學後嚟開工，偶然都要拍到差不多深夜十二點幾一點，嗰時爸爸媽媽交替陪住我，我哋又住得遠，咁夜梗係call的士走啦！」雖則如此，一班小孩在片場玩到翻天覆地，她說：「細路仔最鍾意跑嚟跑去，我哋成日玩捉迷埋藏，暱埋後互捉。我同大哥黃寶龍早幾年已認識，見面就會玩得好開心。但我哋個個都好乖，導演一嗌埋位就自動走返出嚟，返自己崗位做嘢。」
艾威演益蟹？
四蟹之中，棕色西裝的益蟹最乞人憎。原來角色原屬意由艾威飾演，到試造型一天才由陶大宇接上。艾威說：「我原本落重本㗎，買咗好多花恤衫，又去麗晶酒店剪頭髮，到造型嗰日先知自己做光Sir，變咗善良柔情角色。當然會有失望，但換句話講我其實可塑性好高。」
大宇做旺蟹？
陶大宇原本飾演較少戲份的旺蟹，他昨日說：「嗰日我已經着咗醫生袍，等影相嗰陣，韋家輝突然行埋嚟望一望我，個腦好似好多嘢諗咁，跟住同我講『大宇你都係唔好做呢個角色，我轉頭話畀你聽做邊個。』跟住同我講：『你換啲好花嘅衫，做黑社會嗰個啦。』」
刪走跳樓片段
當年無綫因投訴而刪剪兩幕戲，坊間流傳是方敏跳窗自殺，以及方家兄妹被狂徒掟落街。楊羚昨日親證拍了跳樓戲：「青雲教我如果臨跳樓前，如果笑一笑先跳落去，震撼力會唔會勁過發咗癲跳落去？跟住我做咗個笑一笑跳落去。我冇拍跳嘅過程，只搭個景擒一擒。」
穿插歌曲應景
劇中穿插的歌曲除交代年份，亦有點題作用。就如玲姐死前找回進新的戒指，用了王菲的《容易受傷的女人》；孝蟹與方婷的一分鐘狂咀，則配上Beyond的《未曾後悔》；至於龍紀文責怪展博在股票交易間接累死龍成邦，則播出了黃品源的《你怎麼捨得我難過》，完全應景。
市民報案跳樓
拍攝丁蟹掟仔落樓當日，竟有市民誤以為真並報案，飾利蟹的郭政鴻說：「我哋係掟假人落街，可能實在太逼真，有人信以為真，所以有警察上咗嚟天台了解，我哋咪慢慢解釋囉。」
歌曲交代年份
韋家輝善用事物交代時代背景，如開頭講述方進新與陳萬賢對賭，背景為1973年，他向慧玲彈奏一曲，便是Simon& Garfunkel於1970年發表的《Bridge over troubled water》。
哼歌穿崩瑕疵
有幕講到丁家兄弟下格殺令要展博死無全屍，其間幫辦與四蟹講數，益蟹哼出89年電影《我在黑社會的日子》主題曲《飛砂風中轉》挑釁警察，但其身處於86年，理應未有該曲。
慳妹原型性格
據悉《大時代》的人物性格，大都源自韋家輝身邊的人，如周慧敏飾演慳家成性的慳妹，角色原型來自韋家輝的一位女編劇朋友，他曾說：「一切看來量入為出，實則是量出為入。」
七頁一take過
《大時代》其中一幕必睇場口，是黎宣飾演的賤婆婆有感丁家罪孽深重，並跪地向方家認錯。原來該幕戲足足七頁紙，一眾演員一take過沒有NG，認真厲害。
秋官疑似爆粗
慣演大俠的秋官，破格演出躁狂丁蟹，有幾幕更疑似爆粗來增加氣勢。如第一集跳樓戲，他便高叫「跳呀，X家鏟！」；最後一集在聯交所鬧展博，亦疑似說出「四字問候語」。
亞視開戲挑戰
當年與《大時代》對撼的亞視劇，是陳庭威和曾華倩主演的《勝者為王II天下無敵》，而《毒戰》大導演陳木勝便是其中一位編導，可見當年的免費電視戰有幾激烈。
家輝手稿搶手
韋家輝26歲便當上監製，曾先後炮製過《新紮師兄》、《流氓大亨》和《誓不低頭》等神劇。據悉當年他撰寫的《大時代》手稿，其他編劇爭住搶，並放在枱頭留念。
(蘋果日報)有片睇
沒有留言:
張貼留言