鄭少秋前晚為節目《Sunday靚聲王》錄影，雖然劇集《大時代》播出後股市波動，但秋官表明對股市信心十足，毋懼「丁蟹效應」，依然高呼﹕「一句到尾，升！」他直言睇好個市，自己手上的股票仍未放，認為現階段只是市場調整。
飲奶粉健身谷肌 現在練唔到
問可有預期到《大時代》重播再被熱捧？他說﹕「多謝媒體稱這套劇是神劇，當然個劇本身都值得，亦拍得很有張力和節奏感。」可有收到通知拍《大時代》電影版？他說：「看情，我現在還做丁蟹？會辛苦一點吧！當年我要飲奶粉做健身谷肌肉，好辛苦。」是否覺得現在已做不到？他笑道﹕「水準得，還好過以前，但練大隻就唔得啦！」
為何不復出 莫非還怕丁蟹？
對於當年飾演「玲姐」、演技備受讚賞的藍潔瑛，日前表示沒有看重播亦不會復出。秋官即道﹕「點解呢？莫非她還怕丁蟹？她真的是一個好好的演員，那麼入戲，無奈身體抱恙，好可惜。」問如拍電影版沒有藍潔瑛可會感失色？他說：「我想現在很多演員都拍不到了，還是留給大家一個美好回憶吧！」
韋家輝拗贏總經理 丁蟹爆粗照出街
《大時代》重播，劇中角色及劇情均成為觀眾討論話題，當年擔任監製的韋家輝亦備受讚賞。韋家輝接受《明報周刊》訪問時，回憶當年曾因拍攝手法太大膽，被正、副總經理何順忍及何定鈞召見。他說﹕「這個劇題材敏感，但當年被安排在晚上7點幾播，首播後我傳呼機響過不停，兩名總經理沒有責怪我，說是好劇集，但因投訴太多，要調到近9時播出及刪剪。丁蟹在天台掟仔前憤怒爆粗，我都同兩個總經理拗了好久，最後拗到讓我撳低條聲。但有段真的要剪，就是丁家兒子將方家兒女方展博（劉青雲飾）、方芳（吳詠紅飾）、方婷（李麗珍飾）掟落街，這段戲拍了足本，好有力，可惜被投訴後全剪掉了。」該場戲方展博大命捉花架保命，但方芳與方婷不幸身亡，在最後方展博目睹丁蟹掟仔落樓時，才在回憶片段出現方芳與方婷墮樓的一剎那。
網民望重播足本鏡頭 無﹕再作了解
韋家輝談到當日構思拍攝《大時代》，形容丁蟹是集結侯賽因、布殊甚至大家身邊的朋友，炒埋一碟。他說﹕「人人個性都有丁蟹的影子，當有對自己不利的事，一定是別人錯，好少認自己錯；我寫人物好極端，一是極高一是極低。方展博的天才無法發揮，那就不如啦！選擇逃避，但當他能盡展才華，有舞台便不會。」昨日不少網民都表示希望無重播足本鏡頭，問到無企業傳訊部副總監曾醒明，他表示目前《大時代》播映一周，往後戲分安排要再作了解。
記者﹕林祖傑
(明報)
=================================================================
劉松仁跪地哭求 觀眾同喊
【明報專訊】《大時代》劇中不少場面都令觀眾回味，前晚第5集相當催淚，講到方進新（劉松仁飾）被丁蟹（鄭少秋飾）打壞腦，在他回復記憶後，為減輕阿玲（藍潔瑛飾）的負擔，搵到疊報紙工作，但被老闆叫他翌日不用返工。方進新跪地哭求﹕「畀次機會老闆，我畀人打壞個頭，我死蠢，我知手腳慢，我需要份工搵錢養家，我女朋友同我無名無分，每日兩份工，佢要養我同4個仔女，我…男人…好難過！畀次機會老闆！今日做得唔好，唔要（人工）、聽日做得唔好，唔要，做得好，畀人工我，畀次機會老闆……」這一幕戲令不少觀眾感動落淚，大讚劉松仁演技精湛。
 |
| 劉松仁在《大時代》演繹跪求老闆一幕感動不少觀眾。 |
(明報)
==================================================================
《大時代》神級演出 觀眾哭崩 松哥跪求老闆：一鏡過冇NG
 |
| 前晚劉松仁在《大時代》跪求老闆的戲份，令觀眾感動落淚。 |
最近大家晚晚追睇《大時代》，除肉緊丁蟹點解要咁癲之外，被丁蟹打到儍的方進新，前晚跪地哀求老闆：「畀次機會……老細！」同樣震動人心，劉松仁的神級演技極富感染力，他昨透露為求一氣呵成，拍攝這場戲時要求導演：「一take過，唔好cut shot。」而明天播出的第6集，進新將慘死在癲蟹重拳之下，催淚指數爆燈，誓再掀高潮！
無綫深宵重播92年經典劇《大時代》，播出5集場場精采，除丁蟹將四仔掟落樓外，前晚播出被丁蟹打到變儍仔的方進新，為了玲姐和四個仔女出外打工，奈何智力變低，連叠報紙的簡單工作都應付不來，在粥店被老闆叫「聽晚唔使你幫手喇」。飾演進新的劉松仁演出入木三分，身體抽搐兼面容扭曲，跪地求老闆：「我死蠢，我知手腳慢，我需要份工……」男兒有淚不輕彈，但很多男觀眾看到該幕也流下男兒淚，網友更於昨凌晨已洗版式留言大讚松哥演技超班。
「我好少假喊㗎」
23年後重播依然有很大迴響，松哥沒有出奇反應，他昨在電話中淡然說：「嗰時都好大迴響，可能𠵱家有批長大咗觀眾。」松哥一向擅演官仔骨骨的少爺，扮演低智商人士仍是第一次，亦是唯一一次，他自言每個角色都用心去演，他說：「個個角色都難演，唔會話易。」演痙攣神似？他笑說：「可能我嗰陣真係有啲痙攣呢！」雖然拍電視劇沒有太多時間醞釀情緒，但松哥一埋位便能逼出真眼淚，他說：「我都好少假（喊）㗎，因為前戲演咗一段時間，已經入咗個角色，嗰場戲（跪地戲）我同導演講要一take過拍晒我，唔好cut shot。」感情位去到好盡？他說：「係，如果再拍take唔番。」
松哥演戲技驚四座，卻未登上視帝，問他可覺遺憾？松哥豁然地說：「我拍戲咁耐，從來都唔睇呢樣嘢，我針對戲裏面嘅角色，最重要作品出嚟可唔可以令人記得，要大家都鍾意。而收視好唔好，外面評語點我都唔理太多，我只做好自己，最重要自己知乜嘢係好，乜嘢係唔好。」邊場最深刻？他說：「唔可以分開嚟講，冇前面嘅戲，去到嗰場喊戲又唔會咁震撼。」
感動其他演員
進新的慘情遭遇，連一齊叠報紙的游飈都被感動，鏡頭前眼濕濕亦是真情流露，游飈說：「我記得喺中環一條街度叠報紙，嗰場戲記憶都好深，演員唔係一樣獨立東西，係一個team work，好需要互動。演員最難演就係感覺，成場戲主位一定係松哥，松哥帶動我哋投入嗰件事。」眼濕濕？他說：「一定有啦，我哋係習慣性投入，唔可以同導演講畀兩個鐘去入戲，俾人一腳伸開你啦！」而四兄妹在家中教爸爸叠報紙的唐寧則說：「我細個印象唔太深，只記得爸爸儍咗。佢有兩個狀態，當時覺得佢好叻，點解咁唔同都做得咁好呢？」
明天播出第6集劇情將進入高潮，進新漸漸恢復記憶，並學懂自理識綁鞋帶及返屋企。正當一切轉好時，丁蟹拿住袋橙上進新屋企，叫進新不要告他傷人，丁蟹的狂妄觸發進新和童年方展博出手還擊，最終進新慘死在丁蟹重拳之下，方家四兄妹變成孤兒，令人傷感。但松哥不覺可惜：「唔會，一開始就設計咗，我嘅角色主要係帶班後生出場，拍完呢幾集，我任務完成。」
採訪：嵐山
【感動人心】足本獨白
《大時代》第5集尾劉松仁在報紙檔幫手，因為手腳不靈活，被報紙檔老闆炒魷：「聽晚唔使你幫手喇！」之後開始近兩分鐘如泣如訴的神級獨白，贏盡觀眾熱淚。
「畀次機會老細……畀次機會，老細，我俾人打壞個頭，我死蠢，我知手腳慢，我需要份工，搵……搵錢養家。我女朋友同我冇名冇份，每……每日兩份工，佢……佢養我同4個仔女。我……我……男……男人好難過。畀次機會，老細。畀……畀……今日做得唔好唔要，聽日做得唔好唔要，做得好你畀人工我，畀次機會老細，畀次機會老細，老細。」
網民熱話：「視帝級演技」
金光大盜：劉松仁呢啲咁勁嘅內心戲，𠵱家啲靠包裝外形膠面嘅偽人根本做唔到。
彼德c：明明已經睇過，點解都係喊，搞到咁多男人喊。
koyoupk：呢套劇，就算係得5集戲嘅松哥都係交視帝級水平演技。
Oceania：劉松仁演儍仔時嘅小動作、語調、對白，真係打動人心，再對比前一兩集前途無可限量嘅進新，你想忍到啲馬尿都好難。
Candy@_@：報紙檔臨記都好交足戲，冇對白只有眼神都好有料到。
(蘋果日報)有片睇
==================================================================
報紙檔老闆麥皓為 功不可沒
 |
| 麥皓為（左）與游飈在《大時代》分飾報紙檔老闆及叠報紙仔。 |
劉松仁跪求老闆不要炒魷這一幕，好多人睇完都爆喊，除要激讚松哥演技出色，身邊配角亦功不可沒。飾演報紙檔老闆的麥皓為今年已經69歲，與劉青雲、陶大宇、藍潔瑛等同是第12期無綫電視藝員訓練班。
82年加入無綫的麥皓為，外形較老成持重，曾在《他來自江湖》飾演周星馳的老闆，其後參演逾半百部劇集、電影及《笑聲救地球》等綜藝節目。至94年，他轉投新加坡拍劇，有傳曾做過新加坡國家博物館華文義工導覽講解員。4年前他獲邀到內地拍劇集《寶貝女兒好媽媽》，當男主角與朱咪咪演夫妻，之後便退休。
而報紙仔游飈和吳亞圓均在劇中一人分飾多角，游飈又扮炒股專家和出市代表，他15歲入行做特約演員，91年讀完藝訓班後正式加入無綫，多演賊仔及大佬等角色。12年轉投港視，但至去月約滿，現經營小生意維生。
採訪﹕戴彩煥
(蘋果日報)有片睇
===================================================================
十大下場：展博丁蟹紀文「生還者」
《大時代》第一集開始已經有丁家四蟹被掟落樓死亡的場面，明日松哥將會死在丁蟹手中。用死得人多來形容，相信監製韋家輝一定不會反對，以下是劇中十組主人翁的收場，內含劇透追劇勿入。
慳妹（周慧敏）
患有遺傳心臟病，與展博日久生情為情侶。為救展博逃避丁家追殺，找來前大毒梟濟哥相救，結尾隨紅絲巾吹走，安詳死在展博懷內。
方進新（劉松仁）
七十年代的股票大亨有份創立華人證券交易所。被丁蟹一拳打至白癡。得阿玲照顧，當病情改善時，被登門的丁蟹錯手重拳打死。
丁蟹（鄭少秋）
股壇上敗給展博，與四名兒子跳樓自殺，他被電線勾着大難不死。臨尾在羈留病房白髮蒼蒼，並以歪理與展博對辯，被爆經常發噩夢。
羅慧玲（藍潔瑛）
進新死後獨力養大方家4名子女，她目睹方婷及方芳被掟落樓後精神開始失常。在離島時被走火警槍打死，臨終前找回與進新的訂婚戒指。
方家三女（李麗珍、楊羚、吳詠紅）
方芳、方婷及方敏與丁家關係錯綜複雜，方婷跟孝蟹拍拖，方敏被益蟹強姦而染上性病，之後跳樓自殺。方婷、方芳被丁家派人掉落街而亡。
丁家四蟹（郭政鴻、陶大宇、吳啟明、邵仲衡）
孝蟹、益蟹、旺蟹、利蟹在賭輸期指欠債過百億下，被父親丁蟹帶上天台。益、旺、利三蟹被父親掉落街，只有孝蟹從容自己跳下。
周濟生、龍成邦（劉江、曾江）
前總探長龍成邦因指數大升而輸錢，大受刺激心臟病發死亡；前香港大毒梟周濟生則為契女慳妹而出手，結局是死在殺手槍下。
葉天、陳萬賢（羅樂林、江毅）
陳萬賢因商業犯罪被判入獄，在大奇蹟日後負債以億計，獄中吊頸自殺；葉天因股票致家破人亡神經失常，最後於醫院病死。
龍紀文（郭藹明）
為救展博多次請求濟哥及父親出手，在大奇蹟日不甘父親被展博利用，以衰運搭沉丁蟹船，導致父親心臟病發而死，憤而抽身離開展博。
方展博（劉青雲）
遺傳父親方進新對股票的直覺，從長輩葉天手上學曉股票知識，被丁家報復掟落街時大難不死，在大奇蹟日借助三大富豪的好運擊敗丁蟹。
(蘋果日報)有片睇
==================================================================
丁蟹翻Hit添食仲勁
無綫在股市波動之際重播《大時代》令神劇翻Hit，隨即計劃拍電影版希望再創高峰。靈魂人物「丁蟹」鄭少秋前晚自誇若現時拍電影版，演出會更勝從前。而「四蟹」其中三人陶大宇、郭政鴻、邵仲衡昨日聚頭，大爆各人的角色原來是大兜亂。
無綫趁股市翻波，上周二凌晨開始重播的神劇《大時代》即翻Hit，收視高企，無綫有意食住上拍電影版，而兩大靈魂人物「丁蟹」鄭少秋（秋官）及兩屆金像影帝劉青雲自然不可或缺！前晚秋官與汪明荃及李龍基等錄影《Sunday靚聲王》，因《大》劇翻Hit成紅人。問到會否參演《大時代》電影版，秋官說：「睇吓點，依家仲做丁蟹呀？會辛苦啲囉，當年我要食大隻奶粉，做健身，谷肌肉。（怕做唔番？）梗係做到，水準得呀！好過以前添，但練大隻唔得嘛！」《大》劇重播即在股市掀起「丁蟹效應」恐慌，不過秋官卻預告會愈升愈有：「自己啲股票都未放，上個禮拜個市有啲調整，但內地政策始終利好。」
陶大宇寸爆獲讚
除「丁蟹」秋官外，劇中飾演丁蟹四子的「四蟹」陶大宇、郭政鴻、邵仲衡及吳啟華哥哥吳啟明，近日備受網民熱捧。昨日陶大宇、郭政鴻及邵仲衡接受本報專訪，對當年有份參演神劇大感榮幸，更指原來掟方家姊妹落樓的場口未有足本播放，又大爆最終演出班底與原定的角色大兜亂。飾演孝蟹的邵仲衡說：「孝蟹原本係屬意鄭浩南演嘅，我就演陳滔滔，即係林保怡演個角色，後尾收到公司電話叫我做孝蟹，嗰時其實淨係出咗幾集劇本，後來感覺到其實個劇本係因應演嗰個演員而寫嘅！」飾演利蟹的郭政鴻自爆原本冇份拍，而原本演利蟹的大宇，最後改演益蟹。
大宇演得入型入格，於劇中強姦楊羚一幕令人印象深刻，問到當時精力旺盛的他可有尷尬，他說：「冇！連事前溝通都冇，不過有排過戲，佢都知有咩動作，大家都有默契。」他笑言大宇似坦克車：「永遠下巴行先！因為個角色係需要好寸咁！」又說：「有一次放飯，秋官當眾大讚大宇好戲！」郭政鴻亦說：「記得拍掟四蟹落街嗰場，大宇話係咁意做，點知一埋位就七情上面，完全係演技教材！」而大宇謙稱是角色寫得好。
吳啟明生活無憂
「三蟹」難得聚頭，不過就獨欠飾演旺蟹的吳啟明，「三蟹」坦言與啟明「好耐冇聯絡。」不過卻指啟明生活無憂，郭政鴻說：「兩年前喺馬來西亞見過佢，嗰陣喺餐廳啜緊田螺電話響，原來佢喺餐廳食緊嘢，仲有靚車同司機接佢！」邵仲衡亦說：「啟明好似公子，有次我同佢唔使拍，佢揸架保時捷車我去食車仔麵！佢話鍾意嗰啖湯喎！」大宇則自認當年冇錢，而啟明有一次與劇組食飯時豪氣地叫一條大鱔，更埋單請食飯。
(太陽報)有片睇
==================================================================
陶大宇好戲 呃哂蟹仔
無綫重播《大時代》，除令觀眾捱夜煲劇，亦促成「失散」逾20年的邵仲衡、陶大宇及郭政鴻難得重逢話當年。邵仲衡大爆演「孝蟹」人選原為鄭浩南，三蟹又趁吳啟明（旺蟹）缺席，大談他的豪爽事迹。
無綫重播《大時代》，令劇中演員重新喚起觀眾注意，其中演丁蟹（鄭少秋）四名兒子的邵仲衡（孝蟹）、陶大宇（益蟹）、吳啟明（旺蟹）及郭政鴻（利蟹）亦令人難忘，邵仲衡、陶大宇及郭政鴻原來無見面逾20年，昨日難得重逢話當年，應了《大時代》主題曲《歲月無情》一句歌詞：「滔滔的感觸去又來」。
「孝蟹」另有人選？
邵仲衡不諱言「孝蟹」一角為他贏得知名度：「內地幾乎不停翻播《大時代》，好多妹妹仔好鍾意『孝蟹』，但原本唔係我演，係諗住搵鄭浩南做，我本來係做陳滔滔，即係林保怡個角色，但有日唔記得係韋家輝（監製）定曾謹昌（編審）話『你做孝蟹』！咁我就做咗孝蟹。（感覺好幸運？）有得參與呢個劇都好榮幸，嗰時邊個會估到今日？其實保怡好啱做陳滔滔，佢文質彬彬，我覺得韋家輝係因應演員特質滲番入個角色度！」
郭政鴻則笑指大宇當年「行騙」，他說：「拍天台跳樓嗰日，大宇話『陣間我係咁意做o架咋！』，點知一Roll機，佢七情上面，啲戲好到直頭係演藝教材，我被佢跣咗囉！」邵仲衡也附和說：「我好記得當年秋官喺四蟹面前讚過大宇好戲！」大宇笑稱：「係角色寫得好，個個都有戲做，大家都功不可沒。」
齊數啟明豪爽性格
三人又難忘啟明的公子性格，邵仲衡說：「有日晏晝我同啟明呢兩隻蟹冇戲，佢揸架保時捷兜我去西貢食嘢，（食咩？）車仔麵！佢話：『我鍾意嗰啖湯嘛！』」大宇也指啟明對食有要求，他說：「嗰時我哋三個未搵到錢，得啟明一個揸靚車，有日佢見我哋食飯盒，就話：『劏條鱔！』嘩！條鱔成條頸咁粗，我話我哋冇錢，佢話：『得啦！』就請我哋食。」
郭政鴻透露在四蟹中與啟明最有緣，他說：「我算係撞番啟明撞得最多，早兩年喺馬來西亞一間餐廳啜緊隻螺，突然收到啟明電話，原來佢都喺間餐廳，佢又有靚車又有司機，仍然係咁公子！」
場地：Grand Central Bar & Grill
攝影：劉智源
採訪：影視組
| |
| |
(東方日報)
==================================================================
《大時代》hit爆 途人高呼方展博 青雲鬧市拍戲被圍墟冚
出爐金像影帝劉青雲與謝霆鋒，前晚現身尖沙嘴拍攝新片《驚天破》。青雲主演的劇集《大時代》最近重播即掀起全城熱話，雖然該劇還未播到青雲出場的集數，但他前晚於街上拍戲時，仍有不少途人高呼他劇中名字「方展博」。文：娛樂組 圖：袁錦強
無綫深宵時段重播的90年代劇集《大時代》成為全城熱話，前晚播出劉松仁飾演的方進新跪求老闆給予工作機會的一幕更十分催淚，飾演其子方展博的劉青雲則將於下周出場。
青雲前晚現身尖沙嘴山林道，拍攝新片《驚天破》。青雲與工作人員傍晚6時已現身，另一主角謝霆鋒完成灣仔警署的戲分後亦匆匆趕到，至7時許正式埋位。劇情主要講述霆鋒駕車載着青雲抵達現場的文戲。官仔骨骨的青雲相信要配合角色，全情苦口苦面頭耷耷，非常入戲。不過，當導演吳品儒一嗌cut機，青雲立即展現笑容，與工作人員有講有笑。
現場吸引半百途人圍觀，除了有人認出他是出爐金像影帝外，因為《大時代》熱潮再起，更有途人高呼他劇中名字「方展博」，青雲都表現受落。約半小時後劇組轉場到油麻地繼續拍攝，同樣吸引大批市民圍觀，更有途人成功「集郵」，放到網上炫耀。
劇組昨午再移師銅鑼灣鬧市取景，青雲與霆鋒站在人來人往的街頭拍攝，工作人員幫忙疏導交通，並叫途人不要拍照，現場亦吸引過百名市民圍觀，場面墟冚。
自爆壓力大虛脫
此外，青雲早前接受訪問，重提當年拍《大時代》時感到監製韋家輝對他寄予厚望，所以其時壓力好大，更對自己說：「如演得不好就要由30樓跳下來。」更自爆當年因角色令身體和精神虛脫，回家要瘋狂進食去彌補空虛。
(星島日報)
沒有留言:
張貼留言