[新聞] 黎耀祥：老婆煮餸都係我教

享受家庭樂的黎耀祥，是個不折不扣的「住家男人」，不單愛湊仔和陪老婆，還有一手好廚藝，閒時會整幾味「撚手小菜」，原來祥仔着重的家庭觀念是源自亡母的身教，自小培養了一家人過時過節要返屋企食飯的傳統美德。

我家嘅觀念好重，自細就成日喺屋企食飯，阿媽煮餸好叻，我都叻o架！跟佢學嘅！爸爸做消防員，我係家中細仔，以前放學就跟阿媽去街巿買餸……爸爸雖然係消防員，但冇依家咁好福利，一家八口都係住二、三百呎嘅宿舍，一房一廳啦！阿爸都好辛苦，佢唔多講嘢，好傳統嗰隻，我哋之間嘅溝通，唔夠同阿媽咁多！

阿媽影響我最深，我哋兄弟姊妹都幾好感情，阿媽過身後都仲會有一種凝聚力，大家坐埋食飯都會講起阿媽，佢都走咗6、7年囉！不過，大家個心都好掛住佢，如果要我諗阿媽煮得最好味嘅餸，就係生炒排骨，佢唔係一般咁煮，係用醋，排骨又好脆，阿媽話翻炸就會好脆，我都學到啲o架！嗰時每年過年嘅蘿蔔糕都係自己整，我阿爸係海豐人，自己整魚蛋添呀！我對上個阿哥煮得仲叻，全部都係受阿媽影響，連我自己都好鍾意返屋企食飯。

過節要返歸食飯

至於老婆同阿媽嘅相處都冇問題，阿媽好睇得開，又唔使人幫手，反而我老婆廚藝就麻麻……佢煮餸都係我教，而我就學我阿媽，哈哈！阿媽臨走前幾年都睇得好開，有病都自己去覆診，我話做乜唔叫我哋車佢，佢都話唔使麻煩，佢好就我哋，總之過年過節我哋返去食飯就得喎！阿媽係一個知足常樂嘅人，同佢去飲茶都喺樂富、紅磡啲好平民化嘅酒樓，佢話咁樣最舒服，而我又學咗佢，所以呢啲都係阿媽身教得好，同佢咁有溝通都係一種緣分。（全文完）

後記：有求必應

紅透電視圈的黎耀祥像「黃大仙」一樣，對傳媒要求有求必應，就像他這次剛拍畢通宵戲、犧牲僅有的休息時間抽空受訪，認真唔話得！

(太陽報)
http://the-sun.on.cc/cnt/entertainment/20120203/00470_040.html

[專欄] 人生路 - 黎耀祥 考驗

考驗


(2012年02月03日)



媽媽天生就是一個廚師和食家，在外品嘗過的美食而她又感興趣的，回家後就會照辦煮碗弄一碟，讓家人分甘同味；可能因為有媽媽的遺傳因子，再加上耳濡目染，我也喜歡入廚，更喜歡美食，其實正確來說是喜歡吃，即使是吃一個即食麵亦無比享受，連那些味精湯亦喝個一滴不剩。

不知是科學昌明，還是人類愈來愈愛惜生命，無數的食物化驗和分析不斷出籠，令到我們在吃東西之前，腦海就泛起了連串警號，簡單如一個即食麵，原來反式脂肪極高，湯中所含的鈉，亦容易讓我們超出每日的攝取量。現在，每次吃即食麵就如同向死神宣戰，帶著視死如歸的勇氣才喝下最後一口湯汁；還有吃雞的時候連雞皮落肚，更猶如對健康犯下了十惡不赦的罪行。

美味的食物總是對健康有害，這是否上天對人類的一個挑戰和試煉呢？金玉其外，敗絮其中，這是否宇宙其中一個定律呢？這又是一個如何取捨和平衡的問題。也許，中庸之道正是上天要我們學懂的處世哲學。從生存的最基本元素——食物開始，修煉我們的人生。原來，人生路真的不易走，上天無時無刻都在考驗我們。

http://www.am730.com.hk/article.php?article=90983

[新聞] 黎耀祥：諗唔開好大件事

黎耀祥入行廿六年日日拍劇捱壞身子，曾患耳水不平衡的他認為只要勤做運動、食得清淡和保持心境開朗，就是健康的Key Point。他身體保養得好，就是因為「樂天知命」。

捱到今時今日，近呢幾年都好辛苦，不過呢幾年有咁嘅成績好難得，要好好珍惜。好似我當年攞咗視帝，無綫好似乜都關我事，我又唔識推喎！組組都度我去做嘢，以前二、三線角色拍劇排得唔多場口，度我出去做嘢冇所謂，但依家主角拍劇場場都係你，仲應承其他嘅話，嘩！我唔得掂。

後來開始學識做唔到要推！早前我試過耳水不平衡，不過我又唔緊張，要死就死o架啦！我有道家思想，「生死有命，富貴由天」！人哋話全身檢查都睇唔到絕症，好似個肝要打柴係冇先兆，我同老婆喺保健方面都好懶。其實健康好簡單，運動多啲、食得清淡啲、心境開朗嘅話差好遠o架！最重要係心境，我EQ都幾高，諗得開，呢行如果諗唔開好大件事，所以我有呢種性格都好好彩，我個人又冇乜所謂，是是但但就算。

閱歷造就角色

上天對我好好，畀我一步一步嚟，令我積累好多嘢，可以從容面對各種工作。我唔會話自己叻，好似阮兆祥咁，佢都積累好多，佢做戲都好掂，十幾年前我哋演《娛樂插班生》，到依家都仲可以玩扮嘢！佢做「福祿壽」時好有創造力，相反我就謝咗喇！

當年我喺《娛》劇扮「籮記」，但如果依家你叫我做番都未必得，以前後生嘛！依家心境已經唔同咗，演好多沉重嘅角色，因為自己人生經歷多咗，演戲對我嚟講，已經去到咗另一層面。（明日待續）

(太陽報)
http://the-sun.on.cc/cnt/entertainment/20120202/00470_030.html

[新聞] 《缺宅男女》疑抄《談情說案》

無綫劇集往往惹人詬病，昨日有眼利的網民發現，無綫播放中的《缺宅男女》，日前有幕鍾嘉欣和吳卓羲嗌交場面，無論地點、表情和動作，竟與由林峯和楊怡擔演的《談情說案》近乎倒模，尤其嘉欣和楊怡不約而同按頭痛哭、淚流披臉，似有「自己抄自己」之嫌。

(東方日報)
http://orientaldaily.on.cc/cnt/entertainment/20120202/00282_036.html
======================================================
爆喊鍾嘉欣抄足楊怡

無綫劇集屢次被揭抄襲，估不到已「進化」到自己抄自己！有細心網民發現熱播中的《缺宅男女》，日前鍾嘉欣和吳卓羲有幕在碼頭爭吵鬧分手的戲份，兩位演員的表情及言行舉止與林峯和楊怡主演的《談情說案》近乎一樣，網民還將相關片段剪貼出來作比較。

(太陽報)
http://the-sun.on.cc/cnt/entertainment/20120202/00470_051.html

[新聞] 食完人食雞翼《天與地》孖寶食出禍黃德斌巴士開餐教壞細路

由金牌監製戚其義和編審周旭明早前打造的倉底食人劇《天與地》，大受網民激賞，口碑十分好，無綫前晚推出二人的另一作品《 4 in love》，首集劇情講黃德斌和女友周家蔚為爭取時間見面，竟在巴士車廂開餐，訊息錯誤，食到正近日全城熱爆、因在公共交通公具上進食而引發的爭拗事件，被插教壞人。

近日有些內地旅客不守規則，在公共交通公具上吃吃喝喝，網民更譏笑他們為「蝗蟲」和「強國人」，日前又有網友發現有人在巴士上開枱食橙，這些瘋狂片段竟出現在前晚首播、由戚其義監製和周旭明做編審的無綫新劇《 4 in love》中，劇情講述黃德斌和女友周家蔚公然在巴士上層排排坐開飯，遭網友鬧爆。

狂晚餐

黃德斌換位後跟周家蔚在巴士上排排坐開餐，餐盒中有雞翼又有青菜，十分誇張。

 
 
 
 
 
 
 
 
 
 
 
 

搔擾乘客周家蔚將飯盒遞給後座男友黃德斌（左），令身邊男乘客不勝其煩。



 

 

 

 

 

 

 

 

 

 

 

 

《天與地》中有人吃人的劇情，少年黃德斌在營幕中品嚐家明。

 



 

 

 

 

 

 

 

 

 

 

 

 

 

 

 

誇張手法遭投訴

 

在《天與地》有份食家明的黃德斌，今次飾演一名體育新聞報道員，而周家蔚則是夜班護士，二人為爭取拍拖時間便在上層巴士開餐，周家蔚公然把幾盒飯餸遞給坐在後面的男友黃德斌，她身邊的男乘客不勝困擾便提出調位，結果黃德斌和周家蔚公然排排坐開餐，他們快手快腳把餐盒攤開放在大腿，又菜又雞翼大快朵頤。其實巴士跟港鐵一樣不准飲食，這一幕在巴士上層開餐拍拖的場面，確有教壞小朋友之嫌，難怪有網友不滿，在 facebook留言：「算唔算觸犯影視條例？香港巴士不是唔准飲食嗎？嗰個導演一定不是香港人。」

《天與地》班底打造
 
對於巴士開餐劇情，無綫外事部發言人蘇先生昨日表示：「無綫接咗 4個觀眾反映意見，佢哋話公共巴士唔應該食嘢喎。」至於主角黃德斌昨日則在電話回應：「唔好意思囉，呢個係誇張手法，講情侶爭取時間見面，邊會有小朋友學，大家都知唔食得嘢，大家唔好太敏感。」廣管局昨日回覆共接獲 8宗投訴指巴士上飲食教壞小朋友。其實該劇的幕後班底正是口碑大好的《天與地》的戚其義和周旭明，周旭明最愛在微博吐心聲，日前留言：「每次被問到那才是最滿意的劇本時，必借用黑澤明名句：乃下一個戲！但今天在會議上閒聊自嘲，無心宣傳快播出的新劇《 4 in love》，並視之孤兒仔，即為編劇小妹點頭認同復加目光責難，頃刻醒覺《天與地》的口碑，似已深深種在心中，是為自己的劇作終極！」採訪：比華利

(蘋果日報)
http://www.ihktv.com/kenny-wong-were-complaints-bus-to-eat.html
======================================================
黃德斌巴士開餐遭投訴

本報前晚接獲讀者投訴，指無綫周一開始播放的新劇《4 in love》中，一段講述黃德斌與飾演女友的周家蔚在巴士上吃飯盒的情節，不應在近日中港就公共交通工具上進食問題屢生爭拗的敏感時刻播放，令人誤以為「港人做就得、內地人做就唔得」！對此，黃德斌無奈地解釋：「劇情只係想以誇張手法描述一對Couple如何利用搭車時間共膳同相處，唔涉及中港議題，觀眾咁都投訴，演員同編劇好難撈！」

(太陽報)
http://the-sun.on.cc/cnt/entertainment/20120201/00470_061.html
======================================================
黃德斌巴士開餐被投訴

本周一首播的無綫劇集《4 in love》，其中一幕講述飾演體育主播的黃德斌，與飾演護士女友的周家蔚工作時間不夾，為爭取時間相處，被迫在違反車廂不准飲食的規例下，在巴士上食飯盒開餐。前晚本報接獲讀者投訴，指無綫不應在近日有內地人在東鐵內進食惹來港人圍剿的敏感時刻，播放相關情節，以免誤導觀眾港人有在車廂飲食的特權。黃德斌接受電話訪問時解釋，有關情節經誇張手法處理，不涉中港議題，並無奈表示：「觀眾咁都投訴，演員同編劇好難撈！」

(東方日報)
http://orientaldaily.on.cc/cnt/entertainment/20120201/00282_042.html

[新聞] 祥仔投資唔靠炒：你估唔會蝕咩！

「密密做」的黎耀祥，雄霸兩屆「視帝」令他工作接踵而來狂吸金，但他卻無一套完善的投資計劃：「我寧願用勞力密密做，將錢累積起嚟仲實際，你估投資唔會蝕咩！」

口述：黎耀祥　筆錄：影視組

我投資唔叻，好耐以前跟同學夾錢買股票都輸，其實香港冇邊個人未輸過股票！我數口又唔叻，學唔到人哋睇實個股巿，所以我唔適合炒股票。咁多年嚟都係老婆幫手睇住財政，我哋嘅投資都係買層樓住，喺銀行或保險公司買少少基金咁啦！

最近兩年，好似淨係得有錢佬可以錢搵錢，而低收入人士就廿四小時係咁做，係咁多就得咁多！近排啲樓巿咁高，雖然我近年環境好啲，但都追唔到，全部都係有錢佬玩！所謂投資，其實係呃人㗎！投資顧問有套理論話追通脹喎！其實通脹對中產階層影響唔大，通脹後，一隻雞蛋由四毫加到六毫，對中產影響唔大，投資顧問都會成日勸我買樓收租，話每年租金有3、4厘回報。有時投資都唔係賺梗，係有機會蝕！所以我冇興趣！

有叫價能力

可能我性格問題，要錢，我寧願用勞力密密做，將錢累積起嚟仲實際，你估投資唔會蝕咩！我數口唔精，尤其同人傾工作就最慘，成日畀人壓價，不過所謂人老精鬼老靈 ，依家我都有叫價能力，加上我老婆都會幫我傾，好好多。我哋係由低做上嚟，好珍惜做嘢嘅機會，呢啲係老嘢心態，唔係淨係講賺錢，係證明你嘅價值。今時今日有工作搵上門，我都唔會推，少啲錢咪少啲錢囉！得閒咪做咗佢，我就成日都輸呢啲心態，永遠賺唔到最大舊嘅錢，但我會安慰自己，夠用咪算囉！（明日待續）

腳踏實地的祥仔，早前孖住囝囝拍廣告，實行父子檔吸金。

密密出席活動搵銀，令祥仔形象變得更親民。

(太陽報)
http://the-sun.on.cc/cnt/entertainment/20120201/00470_040.html

[新聞] 杏兒加墊俾思捷㩒胸

胡杏兒和李思捷主演的無綫劇《換樂無窮》前日播映兩小時大結局，平均收視 33點（約 211萬觀眾收看），這成績在新春期間算不俗。其中李思捷狂㩒杏兒胸口做心外壓鏡頭最惹人矚目，記者昨日問到杏兒被李思捷狂㩒心口可感尷尬？她笑說：「我墊咗壓力膠，思捷拍攝前都怕尷尬問過我，但唔通㩒腰咩！」黃宗澤會否覺得女友蝕底？杏兒謂：「佢都冇時間睇。」

投訴《缺宅》太慘

另一無綫劇《缺宅男女》受新年假期影響，上周平均收視只有 26點（約 167萬觀眾收看），雖然有不少人對鍾嘉欣劇中的遭遇寄予同情，不過無綫亦指接獲三宗投訴，指內容悲慘、哭泣場面不適合農曆新年播放。《換》劇亦接到兩宗投訴，指內容沉悶和對結局不滿。　採訪：林妃

李思捷在前日《換樂無窮》結局中，為杏兒做心外壓，㩒足 10幾秒。

(蘋果日報)
http://www1.hk.apple.nextmedia.com/template/apple/art_main.php?iss_id=20120131&sec_id=462&art_id=16026710
======================================================
胡杏兒新年流流去世 《換樂無窮》接投訴

【明報專訊】無綫劇《換樂無窮》前晚（周日）播映兩小時大結局，平均收視33點，觀眾人數211萬；最高37點，觀眾人數237萬。劇中淑香（胡杏兒飾）因換命而遇害，女主角在大年初七也要死。

網民羨慕李思捷手壓杏兒胸口

電台主持查小欣昨日說新年流流看到這結局認真大吉利市，廣管局亦接到兩個相關投訴，不滿死屍（淑香）蓋上白布的片段不吉利。不過，討論區不乏讚結局有驚喜，尤其在淑香死後，片尾曲播完，胡杏兒以另一個愛吃橙色橡皮糖的女生角色，跟家仁（李思捷飾）重遇，場面感動，亦有人要求開拍續集。在醫院一段戲李思捷哭到口水鼻涕齊流，有網民羨慕他將頭伏在胡杏兒胸口，做心外壓時更雙手放在她的胸部。

《換》劇監製林志華對「處死」胡杏兒被責太狠心，他說：「拍攝時不知道劇集會安排在農曆新年檔期播映，要是令觀眾不安，我感到歉意；胡杏兒在片尾再出現，大家可當她未死的。至於淑香之死是正面信息，做人要為自己的決定負責任，世上沒有不勞而獲。」他表示未有計劃開拍續集。

無綫另一劇集《缺宅男女》上周平均收視26點，最高30點，廣管局接到2個投訴指劇中有粗言穢語。


胡杏兒新年流流在《換樂無窮》死去被投訴大吉利市，李思捷雙手壓在她胸口卻教網民羨慕。









(明報)
http://ol.mingpao.com/cfm/star5.cfm?File=20120131/saa01/mcb1.txt
======================================================
杏兒遭「胸襲」Bosco呻唔舒服

胡杏兒前晚在劇集《換樂無窮》結局中死去，飾演老公的李思捷不避嫌狂按其胸部作心外壓急救，不少網友指她「蝕晒底」，但杏兒指當時在胸位攝了卸力膠，為求逼真更叫思捷放膽o架：「冇所謂，劇情需要！」但男友黃宗澤（Bosco）得知後笑說：「我個心都有啲唔舒服，要叫思捷幫我按吓！」《換》劇結局被投訴指新年不應出現「死人」，監製林志華指拍攝時不知賀年檔播出，後期製作已盡量淡化。

另外，Bosco與杏兒昨日出席商場騷，忙於內地拍劇的杏兒面上長滿粒粒，幸獲「未來奶奶」送上愛心靚湯。問到今年會否結婚？Bosco表示以工作先行，杏兒即說：「你話點咪點囉！」

(太陽報)
http://the-sun.on.cc/cnt/entertainment/20120131/00470_014.html?pubdate=20120131
======================================================
黃宗澤：個心唔舒服

胡杏兒前晚在劇集中犧牲性命，李思捷不避忌狂按其胸部急救，睇到網友火都嚟，指杏兒「蝕晒底」，但她笑言冇所謂，更叫思捷直接撳胸！其男友黃宗澤得聞事件坦言覺得「個心唔舒服」！

由視后胡杏兒及李思捷主演的劇集《換樂無窮》前晚大結局，最後杏兒為令丈夫思捷做回好人而犧牲性命，新年流流出現死人情節，令不少觀眾眼冤。

胸口攝卸力膠

在急症室一幕，思捷面對杏兒的「屍體」時喊到口水鼻涕狂噴，更多次大力按壓杏兒的心口，為她做心外壓望她「回魂」，演技投入逼真，但此舉卻辣慶網友，紛紛在討論區聲討思捷，指杏兒今次「蝕晒底」，當中有網友說：「佢對手喺眾目睽睽下按住杏兒個胸好耐好耐，仲不斷按上按下，嘩！冇嘢遮o架喎！」

杏兒對於被思捷壓胸，表示事前已做好「準備工夫」，在胸口位攝了卸力膠，更為求逼真叫思捷放膽撳胸：「佢有同我講唔好意思，我仲叫佢直接撳，借位好奇怪，唔真實！（尷尬？）冇，大家都好投入。（蝕底晒好慘？）冇所謂啦！劇情需要吖嘛！」

李思捷亦指杏兒胸前已有卸力膠，因此沒有特別感覺：「我掛住培養感情，冇心情諗其他嘢，冇尷尬！有Talking Point就當Bonus囉！」

搵思捷「算帳」

至於杏兒男友黃宗澤表示沒有看到結局，問到會否呷醋？他說：「心外壓唔通按背脊？不過聽你形容完，我依家個心都有啲唔舒服，要叫思捷幫我按吓！」

前晚的《換》大結局收視不俗平均收33點，最高38點，但有投訴指新年有「死人」不吉利，杏兒說：「我唔係咁睇，最尾我出現番係代表重生，希望大家唔好諗得咁負面啦！」此外，《缺宅男女》亦接獲投訴不滿有粗口出現。

(東方日報)
http://orientaldaily.on.cc/cnt/entertainment/20120131/00282_008.html?pubdate=20120131

[新聞] 祥仔：寧願個仔冇錢

視帝黎耀祥當兒子心肝寶貝，當然想培育他成材，眼見不少家長向子女密集式施教，卻忽略親子關係，祥仔有獨特見解：「為咗學嘢搞到關係差，到頭來個仔發達但係憎我嘅，我寧願唔要！」

我個仔鍾意影相，不過我冇幫佢諗定o架！小朋友係獨立個體，父母都未必明白嘅！我哋只能漁翁撒網式幫佢建立學習項目，可能大咗佢又唔鍾意影相呢？唔同階段會做唔同嘅嘢，父母唯一可做嘅，就係提供足夠嘅支援，就算個仔將來變大食懶都冇辦法！

嘆價值觀扭曲

以前我老婆都逼過個仔彈琴，認為對個小朋友好，其實只係滿足家長嘅情意結！我哋做藝人就明白呢種感受，會代入去諗人哋嘅嘢，好似我個仔，細路有自己嘅世界，有啲家長嘅理論係小朋友要逼，但逼過後破壞大家嘅關係就得不償失！親子間嘅親密係最寶貴，最要珍惜！如果生活上發生衝突，到頭嚟個仔發達但憎我，我就唔要啦！我寧願佢冇錢，但求個仔搵到食，佢可以個個星期陪我飲茶！

時下家長都係望子成龍，逼到啲細路抖唔到氣，尤其香港嘅價值觀扭曲，物質上追求、成就追求，幾乎忘記咗人與人嘅關係！我成日警惕自己，我都會鬧個仔叫佢勤力啲，為個仔嘅成績勞氣，好彩我同老婆都互相開解，因為大家都想建立家嘅感覺，一家人嘅感情好緊要！

夫妻互相開解

其實我好早已經醒覺，好似個仔細細個就黐住我，我又唔介意個仔跟住我出席活動喎……唔係話Show Off，從來都冇咁諗，只係重視家庭！我成日諗到我老咗，有好多錢、自己叻咁又點？最重要都係返到屋企對住老婆同個仔就滿足！所以，我唔會將個仔推出門口，呢個係我小小嘅親子心得，有啲細路反叛，都係啲家長從小將啲細路推咗出去而造成！（明日待續）

(太陽報)
http://the-sun.on.cc/cnt/entertainment/20120131/00470_030.html

[新聞] 視帝祥仔：我有社交焦慮症

入行26年的黎耀祥，於09及10年連奪兩屆視帝，又曾闖影壇4年。當不少好戲之人往外發展之際，祥仔卻因自小已患有的「社交焦慮症」而阻礙前進，但他並不着急，只要想起家庭和兒子便滿足的他自嘲：「我冇大志！」本報將一連五日公開祥仔對兒子、事業的睇法及亡母對他影響深遠的感受。

其實唔係唔鍾意拍內地劇或電影，係好多考慮。首先講電影，我喺98至02年都出過去拍咗4年電影，但唔啱我，我好怕陌生人同陌生環境！依家做咁多活動又做咗咁耐，當然好啲，但心底仍然係唔習慣，所以冇乜新朋友或新圈子，圍內一班人嚟嚟去去都係嗰班！

拍電影每次都唔同公司，Office又唔同、Crew又唔同、成班人都唔同，所以每次要從頭去適應一班新嘅人，見咁多唔同嘅人，我都唔敢講嘢……好驚o架！雖然幾十歲人，始終克服唔到，可能係自細性格都好怕人，其實我係有「社交焦慮症」，但我做演員喎……上天就係咁諷刺！以前讀書，返學時隔籬班房開門，我就唔出班房門口住，等人哋出先，我怕唔知同人哋講乜呀！

「我冇大志」

正如拍電影，我要花好多時間去熱身，又要克服心理障礙先可以投入，如果你問我鍾意邊套電影？係冇一部鍾意，因為自己都做得唔好，唔喺狀態！要我克服個人性格上嘅問題，對我嚟講幾難，所以我都唔嚮往拍電影，相反我返TVB仲開心，TVB個個都熟，梳、化、服行埋個個都係廿幾年嘅老臣子，我會好放心、好信任咁喺呢個環境工作，講嘢都唔使擔心。比起喺外邊，我都唔敢亂講笑，一陣得罪人又怕被人話係大哥，我見呢類語言上嘅誤會太多！演戲都要克服客觀環境，外面咁多人都唔熟，Crew又唔熟、Lighting又唔熟，但我喺TVB可以好放肆咁講笑、玩呀……好似燈光，我會叫就吓我個眼袋，換轉喺出面我就好怕講，人家聽完唔知會話：「當我冇料到咩？」

唔想進一步有成就咩？我會話：「我冇大志！」眼見好多電視出身嘅都出晒去拍電影，好似張家輝。劉青雲都有同我提內地巿場，但我都唔急，我演戲唔係為咩成就，演戲為活喺自己世界，我覺得好享受、好安全、好放鬆、毫無憂慮，所以我唔拍內地劇都係呢個原因，返到去人生路不熟，唯一吸引係錢，又可以同好多實力派演員合作。有時諗，作為演員都要拍吓呢類製作就不枉此生！鄧萃雯同我講唔少次話介紹製作人畀我識，我都話唔使住，隨緣啦！

Profile

現年47歲的黎耀祥（Wayne），85年報讀短期演藝訓練課程，得李添勝賞識獲推薦入無綫藝訓班，86年由閒角做起。他曾轉投亞視，02年重返無綫，直至09年憑《巾幗梟雄》「柴九」及10年的《義海豪情》「劉醒」角色連續兩屆贏得視帝。去年中，《義海》尚未於內地播映，但他憑「劉醒」入圍《第十七屆上海電視節》「白玉蘭獎」的「最佳男演員」，成首位入圍的香港男演員。

祥仔因患社交焦慮症，懼怕陌生環境，所以阻礙他闖影壇發展。

祥仔面對熟悉的環境感覺放鬆，故享受在無綫拍劇。

http://the-sun.on.cc/cnt/entertainment/20120130/00470_001.html
======================================================
拍檔徐子珊：我都驚驚哋

曾與黎耀祥合作無綫劇《法證先鋒Ⅲ》和《舞動全城》的徐子珊，從未察覺祥仔有異樣。

對於祥仔自爆患社交焦慮症，子珊大表驚訝：「《舞動》時我仲係新人，我都戰戰兢兢啦！顧唔到咁多嘢，所以我留意唔到祥仔有呢個問題；但去到拍《法證》嗰時，覺得祥仔思想好正面，佢仲成日教我哋，帶我哋入戲，又有講有笑，真係唔覺得佢嘅『社交焦慮症』對佢工作有影響。但祥仔講到去陌生環境就唔慣，其實我去拍電影都驚驚哋，電影界中我都係一名新人，就更加『焦慮』啦！」

http://the-sun.on.cc/cnt/entertainment/20120130/00470_002.html
======================================================
嚴重者畏懼「假人」

祥仔患社交焦慮症，中國傳統身心行為學家李寶能指這是人際障礙症其中一種：「如嚴重到影響日常生活就要進行尋根式醫治，如催眠。改善方法係要加強表達能力同多溝通。藝人表面好多社交，但工作時就會分工，兩者要互替時未必適應，正如人與人之間傾談嘅真假感情，要由個人作適當調節，否則就出現對假嘅人產生恐懼。」

http://the-sun.on.cc/cnt/entertainment/20120130/00470_003.html
======================================================
TVB好舒服

其實我暫時唔拍內地劇有好多原因，好似我個仔仲細，佢得14歲，佢呢兩、三年成長期我哋大家都會好珍惜，可能三年後冇人搵我，但過咗呢三年我個仔大咗，我就永遠都追唔番。外人會覺得我呢個老竇好難得，其實每個人都要計吓自己嘅得失！但我都唔否定有一日會拍，但唔會主動去爭取，可能過一、兩年心態唔同，又可能個仔拍我膊頭，叫我唔使擔心上去試吓！目前我鍾意返TVB拍劇，又鍾意返屋企，正因為我離開過一段日子，睇通咗亦了解咗自己，原來TVB係好舒服，出面嘅世界好難捱！要重新適應對我嚟講好難。」（明日待續）

有仔萬事足的祥仔，珍惜與妻兒相處的時刻。

http://the-sun.on.cc/cnt/entertainment/20120130/00470_004.html
======================================================
黎耀祥自嘲冇大志
貴為兩屆視帝的黎耀祥，入行26年雖曾闖影壇4年，但未有如其他好戲之人往外發展，原因是祥仔自幼患「社交焦慮症」，怕接觸陌生人、環境而阻礙前進。不過祥仔有美滿家庭和兒子已覺得滿足，不着急事業要再進一步，並自嘲「我冇大志」！

祥仔自言到內地拍劇、拍電影有很多考慮，因為「焦慮症」問題令他不太喜歡接觸陌生環境，即使入行廿多年仍有不習慣地方。曾闖影壇7年的他，被問到最喜歡哪套參演電影時，他坦言沒有：「每次開工都要從頭去適應一班新嘅人，我驚到唔敢講嘢！可能係自細性格都好怕人，其實我係有『社交焦慮症』，但我做演員喎……上天就係咁諷刺！」

愛「娘家」 不外闖

其實劉青雲都有向祥仔提及內地市場之大，但他不急於到內地發展：「我演戲唔係為咩成就而係活喺自己世界度，返內地拍劇人生路不熟，唯一吸引係錢，鄧萃雯同我講唔少次話介紹製作人畀我識，我都話唔使住！」

做生不如做熟，祥仔反而愛返TVB開工，因為在「娘家」可以好放肆地講笑，祥仔說：「好似燈光，我都會叫就吓我個眼袋，換轉喺出面我就好怕講，人家聽完唔知會話：『當我冇料到咩？』」

祥仔因有社交焦慮症，對陌生環境會感到不自然。

(東方日報)

http://orientaldaily.on.cc/cnt/entertainment/20120130/00282_024.html

[新聞] 無綫爆粗喊劇 網友眼火爆

無綫被觀眾由年頭鬧到年底，由鍾嘉欣及謝天華等主演的《缺宅男女》踏入龍年後，集集都喊苦喊忽，前晚一集苗僑偉更爆出一句「×街」慶新春，難怪新正頭網民群起向無綫開年，揚言睇到想打爛部電視！

踏入龍年，無綫似乎未能終止觀眾謾罵情緒，一如以往因安排失當或劇集錯漏百出，而被網民無限上綱。近日由鍾嘉欣、謝天華、吳卓羲及苗僑偉（三哥）主演的劇集《缺宅男女》秉承「傳統」，在新年流流晚晚哭哭啼啼，認真大吉利是！

前晚劇情進入大直路，一開場吳卓羲揭發未婚妻嘉欣與她的老闆兼有婦之夫天華為錢發生不倫關係後，他崩潰喊到瞓地兼嗌分手，兩人在碼頭又喊又叫，非常慘情！未知是否嘉欣去年憑《點解阿Sir係阿Sir》中「Miss Koo」角色一喊驚人，監製張乾文循環再用，刻意勁放催淚彈，用眼淚攻勢搶收視，可惜如意算盤未打響，已遭不少網民怒轟無綫新春播慘劇安排失當！前晚播出的第18集中，嘉欣和吳卓羲同哭的一幕，更搞到人人心情極Down，有網民睇完該幕更揚言「睇到都想打爛部電視」，以宣洩不滿情緒。

監製話冇問題

該集一哭不特止，還爆出粗口，飾演嘉欣大哥的三哥為妹出頭，怒氣沖沖去公司停車場找天華算帳，一見面，三哥即指罵他：「你個×街！」而字幕則以「混蛋」取代粗口，三哥更以成疊現金掟向天華，然後向他揮拳。這一幕惹來不少觀眾非議，認為對白用語粗俗，不適合在電視播出。不過，監製張乾文接受電話訪問時表示，這個字眼曾在不少劇集中出街，無綫方面有專責部門審查對白，若有問題會提出，故認為應該冇問題！

講粗口當問候

雖然劇集捱轟，但有不少觀眾大讚嘉欣和吳卓羲演技進步，二人同哭觸動心靈，除有網民力撐嘉欣應憑該劇挑戰視后外，連吳卓羲也被監製讚「從未如此好戲過」！對於新年播喊劇，嘉欣接受電話訪問時說：「拍時情緒好波動，真係喊到眼都腫！但希望大家唔好着眼喊位，我哋都想帶出好訊息，一家人齊齊整整最重要。」 而天華則笑言不介意新年被鬧「×街」：「都係一個問候啫！」

大結局哭崩全城

鍾嘉欣在新劇中繼續施展「催淚彈」，她與吳卓羲的感情將急轉直下，搞到喜氣洋洋的農曆年都要在觀眾面前哭啼漣漣！劇情講到鍾嘉欣與謝天華發生關係，因而拖垮了與吳卓羲的婚事，二人痛心分手。不過，據知二人的結局會哭崩全城，吳卓羲最終雖然原諒了嘉欣，但嘉欣卻自覺有瑕疵，反而不能原諒自己，故拒絕復合。記者致電嘉欣問結局，她說：「我好鍾意個結局，都會尊重編審決定，有時唔一定每一個結局都大團圓。」

(太陽報)
http://the-sun.on.cc/cnt/entertainment/20120129/00470_001.html
======================================================
鍾嘉欣獲撐喊包有后福

苗僑偉前晚於劇集中拳打謝天華時喊他「×街」，粗言一出甚大回響，而正值新年，劇中主角鍾嘉欣、吳卓羲哭哭啼啼被讀者投訴，不過亦有人大讚嘉欣喊得更進一步，撐她有機會力爭視后。

苗僑偉、謝天華、鍾嘉欣、吳卓羲等主演的《缺宅男女》口碑不俗，前幾晚播到劇中飾演樂樂的鍾嘉欣與飾演富商高宏瞻的謝天華發生關係後，令她與男友吳卓羲分手，結婚不成，二人的催淚演出打動觀眾的心，而前晚苗僑偉（三哥）摑細妹嘉欣、打天華大喊對方「×街」的一幕更引起甚大回響。

「爆粗」惹回響

不過「×街」此粗言出街令觀眾有不少反應，記者致電天華，他笑言不介意新年流流被人鬧，更笑謂：「都係一個慰問啫！」而監製張乾文則表示之前不少劇都有這個「粗言」出街，無綫有專責部門審查對白，若有問題都會提出，故應該沒問題。

鍾嘉欣之前於《點解阿Sir係阿Sir》一「喊」驚人，前晚她於劇中繼續以淚搶收視，農曆新年大時大節哭哭啼啼，有讀者電郵本報投訴，不過鬧中有讚，指嘉欣喊戲再進一步，有讀者戥嘉欣之前「Miss Koo」一角於台慶頒獎禮連最喜愛角色都攞不到不值，力撐她今年憑《缺宅男女》樂樂一角奪視后獎項。

結局更悲情

嘉欣昨日於電話中謂：「獎項呢啲咁長遠嘅嘢唔敢講，好多謝觀眾支持，（喊得辛苦?）拍時情緒都好波動，真係喊到眼都腫，（新年唔應該播喊得咁慘嘅戲！）希望大家唔好着眼喊位，我哋都想帶出好訊息，一家人齊齊整整最重要。」此外，劇中嘉欣與天華有了關係，令卓羲痛心分手，據知結局更悲情，卓羲雖然原諒嘉欣，但嘉欣覺得不能原諒自己，故拒絕與對方復合！

(東方日報)
http://orientaldaily.on.cc/cnt/entertainment/20120129/00282_010.html
======================================================
《缺宅男女》終極結局曝光 吳卓羲拒翻撻不忠嘉欣
 
香港升斗小巿民為圓上車夢，成世打工為買安樂窩，無綫熱播中的劇集《缺宅男女》正以此為題材，劇中苗僑偉一家四兄弟姊妹為物業幾乎反目，當中妹妹鍾嘉欣更因替家人還債和男友吳卓羲炒燶孖展而搭上富商謝天華，搞出複雜幾角戀，劇情高潮迭起，雖然下月中才播大結局，但據知吳卓羲最後拒絕與背叛他的鍾嘉欣復合。
 

無綫早前播映劇集《天與地》，雖然口碑好，但無奈師奶睇唔明，收視下瀉，直至近日由鍾嘉欣、郭羡妮、苗僑偉和吳卓羲等孭飛的 30集劇集《缺宅男女》接棒，由於內容食正小市民置業難的貼身問題，師奶和年輕人都追得特別投入，上周四（年初四）的一集平均收視達 29點，約逾 185萬觀眾觀看。《缺》劇近日高潮迭起，劇中縮骨貪婪大肚婆「關二嫂」黃智雯日前剛產子，另一邊廂的富商謝天華和太太滕麗名婚姻亮紅燈，天華跟下屬鍾嘉欣有婚外情，嘉欣為幫男友吳卓羲搵快錢，賣肉獻身，最終小情侶情海翻波，該劇將於下月 12日播出一連兩小時結局篇，本報率先讓結局曝光。

關二嫂出招奪業權

前晚劇情講述大丁吳卓羲發現鍾嘉欣飾演的女友嘉樂搭上有婦之夫謝天華，他難忍綠帽照頭笠，借酒澆愁下攬住謝天華胞妹賈曉晨（ JJ）。未來的劇情講述吳卓羲為報復被撬牆腳而與 JJ交往，但隨着他往找情敵天華晦氣時，方知道女友鍾嘉欣為愛出賣身體，他感到非常歉疚，有次酒後更發生車禍致昏迷入院。鍾嘉欣不離不棄到醫院照顧病榻中的舊愛，吳卓羲雖感歉意，但最終因為內疚及介意鍾嘉欣與天華的一段情，拒絕與嘉欣復合，二人未能大團圓作結，吳卓羲最後情歸 JJ，鍾嘉欣翻撻舊愛無望，下場孤寂。縱然網友未看結局，但綜觀網友留言都偏向不同情她，多是希望吳卓羲選 JJ為伴。至於與鍾嘉欣有染的謝天華，其正印滕麗名最後以情義擊退小三，與老公婚姻破鏡重圓。《缺》劇除了鍾嘉欣和吳卓羲等的多角戀引人入勝外，苗僑偉和太太郭羡妮最終可否圓買樓夢都令人關注。據知黃智雯夫婦在奶奶盧宛茵死後偷偷改遺囑，將奶奶名下居屋據為己有，令兄弟姊妹為此反目，善良大佬苗僑偉不值胞弟夫妻所作所為反擊，最後成功討回居屋業權。至於黃智雯和梁烈唯這對自私夫婦覺悟後獲原諒，並搬到苗僑偉在圍村起的新屋居住，一家人總算和氣收場。

擬拍另一版本結局

該劇監製張乾文對《缺》劇結局三緘其口，他昨日在電話中說：「結局好出人意表。」原來正指鍾嘉欣跟吳卓羲這一對未能有情人終成眷屬。可會拍另一版本讓觀眾選擇，他說：「呢個係最好，家演員造型都唔同晒。」

採訪：葉雪
======================================================
話你知：道盡買樓艱辛

《缺宅男女》雖被指抄襲內地劇《蝸居》，但由於住屋問題食正香港小市民心聲，故收視和口碑都不俗。《缺》劇反映港人面對的住屋和樓價高企問題，每個人努力打工其實只求有瓦遮頭，可是眾人窮一生精力也未及得上靠炒賣起家的富豪高宏瞻（謝天華飾），很多港人都想學吳卓羲飾演的大丁一樣，從事炒賣活動致富脫貧，惜一不小心，走上萬劫不復之路，像大丁欠下一屁股債，連女友也輸了給有錢人。
 
======================================================
娛樂名人：奄尖網民都讚  

《缺宅男女》接替神劇《天與地》檔期後反應不俗，出名尖酸的高登仔都收貨，劇中位位角色都有發揮，連童星林淽諾（圖中）都獲讚表現賺人熱淚。不過要數最出位的當然是黃智雯飾演的巴辣大肚婆關二嫂，其霸度行為被網民鬧爆，她被關二哥掌摑一集，網民直呼大快人心。主角大嫂郭羨妮在周四一集爆出一句：「等政府出招調控呀？蚊瞓啦！」道盡不少背負樓債的港人心聲，令網民深感認同。

(蘋果日報)
http://www.ihktv.com/lescargot-ultimate-outcome-of-exposure.html