無綫第十二期藝員訓練班造就一班好戲之人，他們在這個演藝舞台上發光發熱，當中表表者包括金像影帝劉青雲，連同期同學曾華倩對他也有一種敬畏感，不過華倩今次大膽相約談心，沒料能將cool爆的青雲「溶掉」，華倩把冰山劈開同時，從中更「化解」了一場28年的誤會！
訓練班篇：唔認cool 坐埋一邊陪笑
82年，一班年輕人報讀「第十二期藝員訓練班」，童心未泯的他們愛玩愛笑，鬧出不少笑話，當中又有很多誤會……
曾：我成日覺得你好cool，沉醉喺自己個世界，我同吳君如、陶大宇成班人玩到好癲，你就坐埋一角！
劉：吓？我唔覺得係咁架喎！可能我怕多人，但我有陪笑架！我都有懷疑過自己適唔適合做呢行，訓練班最窮嗰時，身上得一蚊，但又唔想問屋企攞錢，惟有行路返學放學，又捱杯麵，你見我當年好多活動都冇去架。
曾：唔怪得！我哋當年流傳你得一條牛仔褲，一星期先洗一次咋！
劉：唔係喎！我有三條，不過一樣款之嘛！
曾：穿窿位都一樣？
劉：都一樣呀，其實我咁多年鍾意嘅嘢都差唔多，依家條牛仔褲都有窿嘅！
曾：哈哈哈！咁我哋誤會咗你廿八年呀！原來你真係咁專一！當年我哋算係團結，由朝對到黑，有好多開心事！
劉：係，其實我覺得自己好貪玩，當年一齊排台慶就好好玩喇。
曾：當時你睇好邊個男仔跑出？
劉：大宇就好開朗，做戲又好，話喊就喊！吳啟華就靚仔，係憂鬱小生型格。
際遇篇：勇闖影視 全靠主動
青雲個性低調，卻因為兩次做主動換來意想不到的收穫，第一次令他有機會踩入公仔箱，第二次則讓他闖進影壇。
曾：當年點解會報讀訓練班？
劉：其實係我爹哋叫我報，面試之後好耐都冇通知，我覺得冇理由唔得，於是膽粗粗打電話問，原來封信寄失咗，嗰日仲係截止，我即刻同爹哋飛的士去報名！
曾：好在你打電話咋，有時啲嘢真係整定，咁之後點解去拍戲？
劉：冇架，覺得係時候，但係一個電影人都唔識架。之後遇到爾冬陞（小寶），佢同我講《新不了情》嘅劇本，我即刻自薦，佢冇應承我，冇幾耐，電視劇《大時代》就出街，小寶覺得我得，先搵我。
曾：咁你都幾開口中！一係唔出聲，一出聲就有得着！係喇，咁你點睇依家啲電視劇？
劉：主要係技術、器材進步咗。我有睇《義海豪情》架，我係祥仔（黎耀祥）fans！
曾：我哋當時拍劇合作都算多，記得同你拍《大運河》，有句對白你要趕我走，因為你唔想我陪你死，好man！
劉：你依家仲好touching？你咪傻囉！
曾：個角色令人覺得你係好男人，話時話，我識好多人都好鍾意你，你又唔係靚仔，可能覺得你有性格。
劉：鍾意我啲角色啫！好在我多數角色都係討好嘅。前幾年我攞影帝嗰晚聽到好多掌聲，嚇咗一跳！拍戲攞獎我有試過，但真嘅又唔同，好感動！之後我去街市，有兩公婆喊晒話好戥我開心，好surprise！
感情篇：製造驚喜 老婆玩踢爆
向來甚少緋聞的青雲，與太太郭藹明堪稱圈中模範夫婦，不過他自嘲不浪漫，偶爾想搞驚喜都會被老婆識穿！
曾：嗰晚娥姐（商天娥）餐喜酒，見到你老婆望住你嘅眼神，愛到不得了！佢當你係偶像？
劉：（笑晒）哈哈！佢對眼係咁，生成一個笑樣啫，我就惡樣，日日對住真係唔覺喎。
曾：會唔會坐埋一齊成日冇嘢講？
劉：都會架，結咗婚超過十年，有時耐咗，好正常啫！
曾：唔想太太係圈中人？
劉：冇咁諗，係個人嘅選擇，不過佢真係為咗我放棄咗好多。
曾：過時過節點慶祝？
劉：我就唔慶祝節日嘅，結婚周年紀念就有慶祝吓，送吓花咁。
曾：最勁係咩浪漫招？
劉：好難畀驚喜，有次周年紀念前一日我落街，佢問我有冇帶地址，我問咩地址呀？佢即刻遞張花店嘅卡片畀我，佢識穿晒我啲嘢啦，最大驚喜都係送戒指同飾物咁囉。
曾：賺錢係咪畀晒太太？
劉：都係交畀佢管理啦，費事睇啲英文信，要逐個字查字典。
曾：決定唔生小朋友？
劉：唔喇！冇諗呢樣。
曾：我都贊成，懷胎十月好似好辛苦，但之後養仲難，係成世人嘅包袱。
劉：所以會玩吓朋友個BB，佢哋都羨慕我好free架！
後記：怕糟質唔慣受訪
平日寡言的劉青雲談起往事即滔滔不絕，他解釋甚少接受訪問的原因：「一段感受點可以講咁多次？」令華倩大感榮幸，high爆的她影合照時更不停在青雲身後整古做怪，青雲即笑說：「一出嚟就畀你糟質，知我點解唔出嚟啦？」老朋友敍舊，有說不完的話題，也令餐廳充滿歡笑聲！
採訪：立影
攝影：黎志輝
場地：Grand Central
(東方日報)
http://orientaldaily.on.cc/cnt/entertainment/20110213/00282_020.html
影片－華倩誤會28年 青雲釋不洗褲之謎
http://tv.on.cc/index.html?s=4&ss=20&i=OEN101208-3555-201M&d=1298599549
沒有留言:
張貼留言