祥仔
柴九和劉醒，為原本是電視台小人物的黎耀祥脫霉，成為兩屆視帝。登上電視城之巔，卻沒有流着三色血，非我族類者難道可以三膺帝位嗎？
祥仔見慣風浪，知道人走上物欲橫流的魔道，就會瘋狂：「我一啲都唔驚會跌番落嚟，亦唔覺自己喺高峰，獎項只係獎品！」祥仔的性格極之阿Q，不但未有擔心高處不勝寒，反而預視自己會從高峰過後平淡下來，他說：「平淡係必然，冇人可以永遠順風順水，紅足3、40年嘅有幾多個？一定唔會係我囉！所以我已一早做好心理準備！」講到自己是阿Q，祥仔更拋出頹廢偉論：「我係一個跟自己意願去做事嘅人，但我亦係一個冇目標、冇大志嘅人，冇乜實質嘢想得到，太麻木，用紅唔紅去換六合彩，我寧願中六合彩喇！」
有車有樓心足
如今祥仔有車有樓，只要行過九龍城街市，又或者是旺角亞皆老街，師奶必定把他奉若神明，祥仔亦有求必應。人生如此，祥仔已夫復何求：「我依家有車有樓，買樓仲要係多年前已經買落，只係中間賺錢多咗，由細屋換大屋，我已經有自己嘅位置，亦知道自己嘅位置去到邊，冇理由要我夾硬搬去住加多利山，好唔划算啫！」
既然不會選擇住半山，祥仔也沒有抱大想頭，曾想過返內地賺人仔，甚至進軍大銀幕：「98年我已經出外闖過，有乜大導演我未拍過，雖然當時我唔係主角，至少已見識過，原本我都係適合做電視多啲，但返內地拍劇我又唔想喎！我想抽多啲時間陪個仔，個仔陪得你幾耐吖，將來佢要成家立室，搵多幾百萬都冇用，呢啲錢連豪宅首期都唔夠畀！
預咗衰到貼地
既沒有大想頭，也沒有野心，連人生目標都冇，祥仔連為自己鋪路的想法都冇，但他依然活得悠然，為何？他說：「我唔會為自己鋪甚麼路，因為我淨係識得演戲，過多幾年衰到貼地，再做唔到主角，我已經同添哥講畀個老角我做。錢嘅問題，我真係唔擔心，因為我有買儲蓄保險，計過條數喇！回報OK，就算賣咗層樓，都有幾百萬畀我退休！」若然視帝祥做這個訪問不是做戲，他那歸於平淡的精神，真是令人欽敬，欽敬。
後記：舊車勝新車
訪問當天，正值財爺公布財政預算案，祥仔得知一手車買賣加重稅，他笑了便說：「我都冇諗過換車，買都唔想買新車啦！反而舊車可以變相保值！」口說自己數口不精，原來是機關算盡，祥仔，你真夠鬼！
祥仔自言是個容易滿足的人，不會奢求住半山揸名車。
祥仔憑《巾幗梟雄》劉醒一角，獲封視帝。（資料圖片）
祥仔最重視家人，爭取時間與他們共處。
經歷過高低潮的祥仔，名利在他眼中只是過眼雲煙。
沒有留言:
張貼留言