「唔係阿佘（佘詩曼）起飛腳，張可頤邊有可能拍《法證》（《法證先鋒Ⅲ》）！」知情者說，電視城近日盛傳的是非猛料之一，矛頭直指張可頤，無他，據知整個劇組對這位過氣姐仔皆怨恨，拖慢拍攝進度。「或者佢以為自己真係阿姐！」
事實上，張可頤過往孭飛劇集例必大收，可惜05年北上拍內地劇《長恨歌》後，疑因壓力及情緒問題導致甲狀腺素偏高，眼腫面腫、手震及心跳急速等病徵纏身，最終要停工一年休息。
盛傳5月離巢北上搵食的佘詩曼，以跌甩手臼為由，推掉重頭劇《法證先鋒Ⅲ》，有傳張可頤臨危受命，接替上陣，不過，有經驗唔代表「得」，狀態不復當年勇的她表現緊張，加上飾演法醫，對白有極多專業用詞，不能出錯，令NG頻率多到嚇死人。
龜速拍劇阻收工
為了解真相，記者一連兩日實地探班，首天跟視帝黎耀祥拍簡單對手戲的她完全不在狀態，頻頻NG，拍足一個下午，累到同場的祥仔要在戶外捱冷，幸而勉強趕及收太陽時完成。而祥仔和可頤於戲外交流不多，甚至各自去「醫肚」後才接另一個場景。
第二日，再拍攝一場垃圾桶藏屍案，演法醫的張可頤玩獨家村，全程木口木面，見有記者在場，張可頤煞有介事，無事幹即跳上保母車避席，流水對白頻NG，補妝扮靚次數頻繁，甚至要工作人員預先試位，度到啱先肯埋位。問她為何不在狀態，張可頤瞪大眼死撐說：「其實拍完《女人最痛》後已適應拍劇，依家狀態更入緊直路，算OK。做法醫，成日有驗屍後偵察報告，對白有難度，有晚試過緊張到講對白講到背心出汗，成個人都滾晒，足足NG八次，打破晒我呢啲資深演員嘅紀錄！祥仔都NG啦，次數不遑多讓啫。」拍檔都拖落水？好嘢！
自以為阿姐級的張可頤，接手拍攝《法證Ⅲ》，更與視帝黎耀祥合作，可惜狀態麻麻的張可頤頻頻NG，令視帝甚為無癮。
張可頤寧願企埋一邊補妝，要工作人員預先試好晒位，度到啱先肯埋位，認真大牌。
曾被指掛住玩的徐子珊，這天與吳卓羲找馬賽查案，幾個年青人圍理，玩得極Happy。
(頭條日報)
http://www.hkheadline.com/ent/ent_content.asp?track=news&contid=140633&srctype=n
http://www.tvbchannel.com/forensic-heroes-shooting-lai-yiu-cheung-maggie-cheung-ron-ng-kate-tsui-etc.html
沒有留言:
張貼留言