無綫台慶劇《無雙譜》有黎耀祥和田蕊妮這對視帝視后級人馬坐鎮，雖然二人劇中對手戲不多，但阿田自爆在片場常「冤」住祥仔研究劇本：「咁大間城隍廟，唔係唔問呀？我唔係成日問人㗎，見係佢先問。」
祥仔激讚阿田專注：TVB近10年未見過
祥仔亦盛讚阿田是好對手兼好同事，每次開工跟對方的話題都是圍繞做戲：「不似現在好多年輕演員圍埋一齊不是談波鞋便是談上咩網、whatsapp等，我心諗：『關咩事呢？而家做緊戲喎！』本身拍電視劇時間已好趕，為何還可分心去玩呢！而阿田是會好專注、專心和尊重去做好那件事，我好欣賞她這態度，我在TVB近這10年未見過有一個演員係咁專注，當佢做緊戲時，佢所有的諗法、思想、行為都係圍繞住做戲。」
阿田愛與祥仔聊天 學演戲做人道理
阿田直言特別喜歡與祥仔聊天，因為不止在演戲上會有所得益，亦想從祥仔口中吸收一些做人道理：「佢同我講過做戲無論幾好都好，根本係關乎你五臟六腑的事，我初時諗都冇諗過關咩事，最多都係關我的情感事，原來佢就係話情感會帶動你的五臟六腑，即係你個人燥，某程度上係影響緊你的肝臟，每次聽完佢講我都有得益，雖未必即時做到，但在第二套劇我知道自己做到。」在旁的祥仔則開玩笑說，遲一些你做到肝炎便到位了。
祥仔：阿田不要跟我爭視帝
祥仔在《無》劇中飾演的朱爾旦性格單純，處理上亦比較簡單，相反阿田要一人飾演兩角，其中一角更是一個切切實實的男人，她坦言剛看到劇本時很興奮，但拍落卻覺得十分辛苦，因不斷男女轉換，笑言差點黐線：「我試過好投入地去演哥哥，之後好快又轉妝做返妹妹，當時居然有毛管戙的感覺，覺得自己扮女人。有時兄妹同場，還要幻想對方存在，對住空氣自己做戲。」祥仔盛讚阿田今次演男人及格有餘，並笑言叫對方不要跟他爭視帝。阿田鬼馬說：「好啦，我讓個視帝畀你。其實我一早都睇好祥仔，因之前睇完《梟雄》宣傳片後我直接同佢講，我好耐無睇過終於有得畀黎耀祥爆的角色，我見到佢眼中有火，我都好期待。」
阿田在《鬼同你OT》裏的一個「神同步」，讓她在視后爭奪戰中率先帶出，成為熱門人選，加埋今次在《無》劇中一人分飾兄妹兩角，自然被睇高一線。而祥仔的勢頭也不比阿田弱，一人獨攬《無雙譜》和《梟雄》兩套台慶劇，連影帝黃秋生都看好他，好大機會第四次舉起視帝獎座。
四度封帝？「咁我梗係想啦」
問祥仔可有信心第四度封帝？相比於對演戲的貪戀，祥仔對獎項則隨遇而安，他坦言信心一向都沒有，因攞獎包含很多因素在裏面，不是攞了就代表你好，亦不會刻意去追求：「不過你問我想唔想攞，咁我梗係想啦，你話畀我當然好啦。」阿田亦認同攞獎要看天時、地利、人和，不到自己去想和計算，但她對自己的演出一向都有信心，覺得演員要有信心才可站在鏡頭前演戲。二人亦齊聲表示看好對方再獲得視帝和視后。
演戲如人生 上上落落才好玩
「人生有幾多個十年？」祥仔將迎來入行第三個十年，事業上經歷過高山低谷，憑住對演戲的鍾情，他由初入行的一個跑龍套變身今日的三屆視帝，他認為演技和人生一樣，沒有到頂的，演技會隨着人生經歷而昇華：「演戲和人生有一個共同的元素，就是經歷。我經常都說演戲唔係一個表演，演戲係一個經歷，經歷唔會到頂的。就算你現在擁有所有東西，但第二日醒來又可以有其他經歷。」阿田亦覺得演技正如人生一樣，未去到最後一刻都不知自己哪一秒最精彩、最燦爛，不會有人不停上，亦都不會有人不停跌，一定是上上落落才好玩。
每個成功男人背後都有一個賢慧的女人，祥仔感謝身邊的那個賢內助，無論是屋企事，抑或是工作上的安排都幫他打理得井井有條，讓他可專注工作。
阿田與杜汶澤聚少離多「互相掛住」
相比祥仔兩公婆形影不離，阿田和老公杜汶澤各有各忙，聚少離多：「心掛掛都會，因為佢成日飛來飛去，我雖然在香港，但又不在屋企，所以都會掛住。但我覺得咁樣幾好，因為仲有互相掛住的感覺，是幾難得的，同埋會珍惜放假的時候。」
祥仔自覺年紀大 滿足現狀
而經過多年默默耕耘，終於捱出成就，祥仔和阿田都特別珍惜現在擁有的一切，對獎項及名利反而不會看得太重，對祥仔而言現在是很適中的階段：「我經常都話後生應該搏，但我們始終年紀大了，同後生真係兩個心態，如果我現在30幾歲，我真係會同你講我還可以有好多發展和想法，不過老實講，如果我現在要發展新的事業或市場，10年、20年後都70歲，唔通仲做男主角？我好滿足這個時刻，我覺得現在是恰如其分地做自己的事，不會再去超越，或強求啲咩。我現在心態好舒服，有又得，冇又得，嘗試在每樣嘢中間找到樂趣。」阿田則希望自己不斷成熟、不斷經歷，從而豐富自己的內在，這也是她這刻想追求的。
黎耀祥髮型：Ivan@HEADQUARTERS
黎耀祥化妝：Din Tse@gmail.com
田蕊妮：ZADIG & VOLTAIRE @ I.T
場地：香港觀塘帝盛酒店
記者：陳釗
攝影：梁迺楠
(明報)有片睇
http://ol.mingpao.com/php/showbiz3.php?nodeid=1444501024149&subcate=news&issue=20151011
沒有留言:
張貼留言