KKground... ......................... . 搜尋文章請按首頁左上角...................................................................................................@留言請按我@

2011年6月1日 星期三

[東周刊第405期] 堅強的理由 佘詩曼



有些藝人,明明已努力專注工作了,但不知何解,緋聞和是非總是傳個不休。佘詩曼自九七年當選港姐季軍後,入行十四年,由最初沒有甚麼觀眾緣,捱到演技得到認同,連獎項都拿過了,但外界偏偏卻對她的緋聞,以及不和是非最有印象。

多年來均宿命如此,阿佘只有無奈接受,每次回應這些壞新聞,惟有兵來將擋、隨機應變,要不然亦只能付諸笑談,一笑置之——反正,她很清楚當中有多少真、多少假,排山倒海的工作已令她冇覺好瞓,哪裏還有心力去把這些負面新聞耿耿於懷?

然而,最近她被拍到跟僑豐金融業務發展董事蕭猷華飯局,有封面大字標題指她「勾人老公」,令她終於不得不作出反擊,跟當事人蕭氏夫婦即時聯名發出澄清聲明。

「這次我不能再做弱者,我要站出來!這件事對三方都造成了極大傷害!」發出聲明後,她如是說。

是的!作為女性,被老屈「勾人老公」,的確可以令千年道行一朝喪,甚麼聲譽和多年努力,都可以因此掃地——阿佘今時今日能夠以一線花旦價,被內地邀請拍劇集,絕對不是因為她的緋聞和是非,她多年來在工作上所付出過的熱誠,請大家不要抹煞。














向前

佘詩曼最近跟無綫結束多年經理人合約,改了部頭合作形式,加盟了內地龍頭影視公司華誼兄弟,全力進軍內地市場。有說,因阿佘在內地的名氣甚高,華誼決定以十五萬一集的一線花旦價錢,為她開拍兩齣劇集,另外再加千萬廣告力捧,難怪她會轉往北上發展!

「其實我跟TVB仲有好好嘅合作關係,跟住喺香港都仲會繼續拍劇。我同華誼只係傾緊合作拍《模特兒》同《非誠勿擾》兩齣電視劇啫。」

可有想過將來會成為內地一姐?「我依家都唔知將來嘅事會係點,冇諗到咁長遠。我選擇離開,主要原因係唔想討厭我嘅工作。我喺TVB十四年,好多對手都合作過,重複又重複,就算係演唔同嘅character,對手都係嗰啲,大家都會冇新鮮感!做演員最驚係畀人覺得『又係咁樣』,如果我繼續日日咁樣過,冇乜進步、冇火花,我唔排除我會討厭我份工!

「我唔想原地踏步,我想向前行!依家我喺內地同香港拍劇,可以接觸到更多唔同嘅景同劇本,可以同唔同嘅人合作,可以有更多新火花,咁樣我會更加鍾意我份工!」

對於這個改變,她坦言曾經亦有掙扎過的。「要行出一個溫室,真係需要好大嘅勇氣!」

得著

九七年阿佘參選港姐時,我也有同行那個北京外景拍攝。訪問這天跟她說起,彼此都難免有些感慨。「眨吓眼就十幾年,有好多印象仲好似尋日發生咁!我仲好記得要上去長城,好斜、好熱、好辛苦!但對於當年一個細路女嚟講,參選嗰兩個月,真係學到好多好多嘢,係一個好好嘅experience!唔去試吓,真係唔知佢嘅苦與樂!如果要我重新再揀會唔會參選港姐,我會囉!」

當選了季軍後不久,她便跟無綫簽約開始了拍劇生涯。「喺TVB最大得着,係畀我搵到一份我真係鍾意嘅工作,呢樣嘢係好幸運嘅事!公司一直冇放棄過我,even我早期唔係咁得人認同,其實公司絕對可以唔用我,但佢哋反而仲不斷畀好多機會我!」

結果,如是者,這十四年來,加加埋埋她已拍了逾四十齣、過千集的電視劇,用青春換來名和利,還有日夜顛倒、不眠不休的非人生活。

喪屍

「你話TVB拍劇工時長咩?其實咁多年嚟,好多前輩都係咁馬不停蹄、捱更抵夜o架啦!當然都有諗過放棄,但既然有咁嘅機會,自己又鍾意,辛苦啲都冇所謂!呢個係give and take嘅問題,係自己嘅選擇。」

她其中一次最難忘的開工經歷,是當年拍第一齣電影《跑馬地的月光》。「連續三、四日,日日都日夜係咁拍!有晚我入廠拍劇,攞住份劇本對緊稿,有工作人員幫我set緊咪,突然『噗!』一聲,個劇本就跌咗落地,原來我企喺度嘅時候,都已經攰到瞓着咗!後來我再接住去跑馬地一間bar開電影,由星期六間bar收工開始拍,星期日拍足廿四個鐘,再拍埋星期一成朝,三十幾、四十個鐘就咁困咗喺間bar裏面,結果成組人個個變晒喪屍,啲梳化個個輪流一條條咁攤咗喺度……哈哈哈!當時真係好辛苦o架!但諗番起,又係一個好難忘嘅經驗!其實我當時可以選擇唔拍齣電影,就冇咁辛苦,但選擇咗,就要頂!」

阿佘說,趕頭趕命、捱更抵夜的開工生活,最大好處是,沒有時間讓她的腦袋裝載令她不開心的事。「呢咁多年嚟,公司畀我嘅機會根本連我唔開心嘅時間都occupy咗,我冇乜時間去唔開心,可能只係揸車返屋企途中,先會有啲時間去諗吓:『唉,今日又畀人話我雞仔聲……』但一返到屋企,嘩!快啲沖涼,得兩、三個鐘瞓,真係唔好諗咁多,快快趣趣大被冚過頭,瞓醒咗呀,嘩,快啲快啲返去,一路仲要諗吓今日場戲呀,今日食啲乜好呢……乜都好趕!」

























一姐

數年前,因為《十月初五的月光》演技備受讚賞,她被封為「無綫一姐」。「當然,人哋咁樣講,都係一份尊重,但我自己就真係冇裝喺呢度(指着自己心口)。講真,我覺得,一姐,我直頭未夠班啦!喺我心目中,一姐永遠都係Do姐、Liza姐,佢哋好全面、乜都得!我自己?仲有好大嘅進步空間,始終啲嘢你永遠都學唔晒,所以要永遠keep住自己係一嚿海綿,永遠喺度吸吸吸,直至自己覺得唔想做一件事,或者厭倦喇,咪停囉,但起碼嚿海綿都係脹卜卜嘛!」

至於甚麼「視后」之類的獎項,阿佘睇得更開。「我唔明點解有啲傳媒話我,因為上年攞唔到個獎先至拒絕簽約!好坦白講,個獎對我嚟講,唔係咁重要,攞到當然係錦上添花,未攞過嘅,當然會在意啦,但我唔係一個貪心嘅人,曾經擁有過,我已經好滿足o架啦,點解年年都係你啫?畀人,人哋可能實至名歸呢,人哋可能fans多啲呢。喂,我嗰年要付出嘅努力盡晒o架啦,仲想我點啫?我現階段唔係咁着重呢方面囉!」

是的!對於阿佘這個級數的藝人來說,北望神州,絕對比得到一個獎座
更具遠景和前瞻性。


不是抵得渴得問題

有些人或會認為,佘詩曼既然選擇得做藝人,加上人紅才會招來更多話柄,應該食得鹹魚抵得渴。其實阿佘多年來已經「抵了很多次渴」,詳情可翻閱她多年來回答花邊新聞或負面報道的反應,你會發現,她沒有一次是黑口黑臉的——單是最近「花家姐」一角被狠批,以及她和前緋聞男友鄭嘉穎一起出席活動時,被重提舊事,她不還是笑笑口嗎?

那麼,被大字標題指「勾人老公」,既然不是真實,她也可以不用即時發出聯名聲明咁大件事,「咕!」一聲吞下去就是了吧?

然而,藝人都是人,始終都會有底線的,不過是一頓飯,便已經可以寫出這四個分分鐘遺臭萬年的字,如果這樣都能啞忍,之後她要面對的負面新聞,大概會更甘更大鑊!更何況,這次不是鹹魚咁簡單,而是死貓一大隻,試問點擺得入口?



http://www.eastweek.com.hk/index.php?aid=12985

http://tieba.baidu.com/f?ct=335675392&tn=baiduPostBrowser&sc=12517961435&z=1095520159&pn=0&rn=30&lm=0&rs16=0&word=%DC%C6%E7%F9%B5%FB%B9%C8#12517961435

http://tieba.baidu.com/f?kz=1094907785

http://news.sina.com.hk/news/15/1/1/2397168/1.html?l=768581

沒有留言:

張貼留言