[新聞] 大姐大手記﹕鄭則士黎耀祥鬧不和 嘥氣！

【明報專訊】搞是非、鬧不和，是娛樂圈永恆的話題賣點，有真亦有假，不少更被利用作宣傳招數。有人的地方就有是非，雖然不和通常發生在女藝人身上，但有時男藝人的反目程度，絕對過之而無不及，更加無年齡界限！最近辣到兩位「帝」級人馬黎耀祥、鄭則士（Ken哥）頭上，說祥仔拍《造王者》爭戲分兼改對白，令Ken哥火滾向監製梁材遠投訴：「視帝大晒呀？我都係影帝！」

Ken哥與祥仔在娛樂圈打滾幾十年，嘗盡高低起跌，會為爭戲分搞到反目？實在難以置信。祥仔同大姐大講起這單新聞都「冇咁好氣」，他說跟Ken哥睇完都得啖笑：「我哋加埋成百歲，仲後生咩！有什麼好爭？依家日夜趕拍，連瞓覺時間都好少，可以的話，我寧願畀錢搵人幫手拍多幾場戲。無端端話我哋不和，好無聊，真係嘥鬼氣！倒不如炒大些，當幫套劇宣傳。」

祥仔與Ken哥幾年前曾合作《盛世人傑》，只是變了「倉底貨」無得出街，不過兩人合作愉快。今次Ken哥為了與視帝祥仔鬥戲，推了好多工作，戲裏擦出不少火花。Ken哥又不時將他與祥仔拍戲的照片上載微博，力證無不和。Ken哥懶理是非說：「戲拍出來好看，就是演員最開心的回報。」

講起男藝人不和，印象最深刻是當今兩位分別叱咤歌壇、影壇的同姓男藝人，出道時曾稱兄道弟，Friend過打Band，確實一度「同姓三分親」。兩人雖然當年同被無綫力捧，但無損兄弟情，互相鼓勵；豈料其中一方被爆出一單負面新聞，另一方竟即時劃清界線，回應時說大家其實不太熟，非常現實。從此，兩人當然再無Friend做，亦無合作機會。

視帝黎耀祥笑言與影帝鄭則士加起來差不多100歲，怎會為爭戲分而不和？

(明報)
http://ol.mingpao.com/cfm/star5.cfm?File=20111125/saa01/mbo1.txt