[壹周刊第1091期] 黎耀祥飽過劉華

劇情講黎耀祥激嬲劇中老婆胡定欣同埋個女，於是搵張可頤陪佢一齊行玩具店買禮物氹番個女，問黎耀祥之後會唔會同張可頤發展婚外情，佢話要保密，唔講得住！

無綫新劇《法證先鋒Ⅲ》上個禮拜五（一月廿八日）响九龍灣拍攝外景，因為佘詩曼受傷辭演，臨危受命頂替做女主角嘅張可頤當日亦有埋位，唔介意執二攤，專登剪短髮配合角色嘅可頤仲話等咗七年終於可以再同黎耀祥拍劇。

「我哋之前合作過《楚漢驕雄》，七年後嘅今日祥仔已經變咗視帝，黐住佢可能我運氣都好啲！」
好似執到寶咁，張可頤仲開心到踢爆黎耀祥顧住減肥，唔肯陪佢一齊食飯：「我見佢食得一條蕉，再飲咗碗湯咋！辛苦過啲女明星呀！」
秘密大公開，黎耀祥解釋：「我拍《義海豪情》其實瘦咗十幾磅，不過我太易肥，唔節食唔得啦！而家淨係可以飲湯同食蕉。（怕唔怕開工頂唔順？）猩猩咁大隻都係食蕉啦！劉華長期唔食飯都得，我冇六嚿腹肌之嘛！」嗱嗱嗱！劉華話自己有食飯 o架！詆譭劉天王，黎耀祥你又唔乖嘞！

係女人都貪靚，張可頤無時無刻都會叫工作人員補妝補唇膏，高清年代，無辦法。

有小妹妹 fans嗌合照，張可頤即刻踎低影番張靚相。

黎耀祥都有 fans，不過，係師奶，拍咗咁多年電視劇，果然做到師奶殺手。