無綫花旦唔係佘詩曼就係楊怡加胡杏兒，位位過 3張仲要扮 18、 22好難頂。好在最近無綫終於多咗班後生新鮮女做吓細妹乖女角色，件件青春總算睇得吓。
好似晚晚播嘅《依家有喜》，做米雪女嘅暉暉（林秀怡），雖然外形男仔頭但夠晒幼齒兼天真， 19歲女影相帶埋阿媽監場堅係純女；另一位早排喺《巾幗裊雄》做少女版四奶奶的蔣家旻更加係索女多人錫。
睇電視都要講新鮮感， TVB係時候發掘多啲新女啦！
林秀怡天水圍慳妹
林秀怡喺元朗天水圍公屋長大，拍過一次拖咁大把，她說：「我中四、五嗰陣同同班同學拍過拖，之後唔知點解大家冇搵就散咗， TVB雖然多靚仔，不過靚仔唔會睇中我啦！」
林秀怡之前喺《女人最痛》入面演肥妹大小姐，最近於《依家有喜》再做米雪女，又拍住巨星幫胡鴻鈞拍無綫 iPhone App廣告， 19歲剛喺藝訓班畢業嘅新女算多機會。
增肥博撈
林秀怡多嘢撈只因乜都肯做，連港女大忌變肥妹都冇所謂：「我之前拍《女人最痛》做肥妹增咗 10幾磅，拍《依家有喜》就將跟咗我好多年嘅長頭髮剪短，公司想我中性啲，我梗係鍾意啦，我想學楊怡咁型女啲，我又唔係靚女，要更加努力，同胡鴻鈞拍廣告，佢哋都係因為我乜都肯做，先畀機會我咋。」
19歲妹妹仔識諗，最難得係肯聽阿媽話，元朗長大、現居天水圍公屋嘅林秀怡一啲物質港女惡習都冇。林媽媽話：「 3年前我同佢阿爸離咗婚，之前喺惠康做收銀。秀怡好乖 o架，平時都唔會亂買嘢，佢着嘅衫都好平，話舒服就 ok喎！」林秀怡續說：「係呀！着衫冇乜所謂，襯咪得囉，我今日對鞋都等咗 3個月到大減價先買，有一次化妝姐姐問我做咩着來着去都係同一件外套，我先知原來出騷連續着同一件衫唔係咁好咋！」
咁慳家，啱晒啲淘寶宅男口味喎！
先增肥
林秀怡於去年《女人最痛》中飾演肥妹學人減肥，戲分唔多但仍願意增肥 10磅：「我之後都減得好辛苦呀，難得監製搵我，梗係搏命做啦！」
再剪髮
增完肥，林秀怡於播影中的《依家有喜》中又要將由細留到大嘅長髮剪咗：「公司想我中性啲，我都好鍾意！」
父母三年前離異，明知阿媽持家困難，所以林秀怡平時買衫都唔會亂使錢：「我由細到大所有衫褲鞋都喺元朗買，好似我隻麵包超人手表，要 120蚊，表咋喎，好貴呀，不過我覺得自己好似麵包超人，所以貴啲都買啦！對鞋都超貴，原價$1,000，我等足 3個月半價先捨得買咋！」
群妹起革命
無綫要搵新血，大班新鮮女排隊等攝位，其中選過 07年港姐的黃智雯更將於重頭劇《飛虎》中，再次孖住大隻羅仲謙做第二女主角，到時真係要畀足眼力?實呀！
黃智雯升呢女主角
喺去年套《搜下留情》飾演羅仲謙男友仲傳兩人堅拍拖嘅黃智雯， 07年選完港姐後喺無綫浸足 4年， 28歲女有機會升呢做第二女主角：「多謝公司畀機會啦，我同羅仲謙好兄弟嚟 o架，咁啱再合作啫，點會傳緋聞！」
丁樂鍶腸粉變助手
09年喺無綫畢業後做過美味天使「腸粉」的丁樂鍶， 23歲女最近喺播放中嘅《隔籬 7日情》同《魚躍在花見》中都有份演出，喺拍攝中嘅《心戰》中角色亦愈嚟愈重，她說：「《心戰》我做秋官助手，臨尾 5集戲分好重，有戲演 o架，我唔心急做女主角嘅，慢慢做學吓嘢先啦！」
關婉珊做女最掂
08年加入 TVB後一直都係做秘書或者主角身邊同學角色， 26歲女最近喺《仁心解碼》做方中信乖女終於被人留意，亦在未出街套《點解阿 Sir係阿 Sir》中做學生妹。
少女四奶奶蔣家旻：好想去台慶！
因為自細成日發白日夢，所以媽咪搵師傅幫佢改名做蔣家旻，話希望佢踏實啲喎！
化粧： Zurica Chow
髮型： Leo@ O4 Osmosis
《依家》妹林秀怡，乜都肯做終於攝到位，同樣經常飾演阿妹兼主角童年嘅蔣家旻，最近亦開始捱出頭。佢話最希望攞「飛躍進步女藝員」，不過第一目標就係可以出席台慶亮燈：「就算企喺山頂邊，我都想去吓！」
堅持等運到
07年應徵做 TVB，同期仲有一蚊 Joe游莨維，可惜之後 TVbeople冇影。阿爸做物流、阿媽做文職的蔣家旻說：「嗰時阿媽鬧我日日喺度 hea，佢鬧咗我一餐 o架，不過我想再試吓先！」
21歲蔣家旻係獨女，父母想佢踏實，不過蔣家旻中五畢業後就即刻填 form做 TVbeople，可惜簽約後成個月先得一個 job，搞到同阿媽炒大鑊，?家同無綫係包騷合約，計埋每月人工仲低過 7千，佢話：「如果可以加人工就好，份糧除番 12個月， 7千都冇，好在我夠慳，日日返屋企食飯。」
演迷幻妹除衫
蔣家旻喺《巾幗》做少女版四奶奶，嚟緊喺新劇《天與地》中，蔣飾演佘詩曼少女版，她說：「其實我本身已經夠年輕，所以冇必要再扮細個，太過嗲聲嗲氣反而唔自然呀！」
蔣家旻之後入咗訓練班，大部分角色都係做主角少女期或者細妹，包括《巾幗梟雄》四奶奶（鄧萃雯）童年，《鐵馬尋橋》向佐細妹。「可能我細粒啦，似人阿妹，最近喺《法證先鋒 3》我做啪丸妹，仲有場戲要我一路扮 wing、一路除衫。其實我最想去台慶亮燈，不過要俾無綫簽咗經理人先可以出席 o架，我哋係包騷藝員冇得去，就算要我企喺山頂邊，影唔到我都唔緊要。」努力啦，終有一日可以企正中間嘅！
蔣家旻做細妹入型入格， TVB大班藝員亦當正佢係細妹攬頭攬頸 friend到震，她說：「馬國明有次仲走埋嚟同我講：『我哋間錄影廠都冇女嘅，不如你過廠啦』，個個都好錫我 o架！」馬明撩女仔好大膽喎！
小生揀女
無綫肯捧新女唔只觀眾有眼福，其實對班小生嚟講都係好事，起碼唔使次次熟口熟面冇厘火花，其中馬國明成日撩蔣家旻玩梗係激讚蔣有前途啦！
馬國明︰蔣家旻好得意，佢唔會遲到，有潛質呀！
王浩信︰我撐黃智雯，佢做咩角色都得，佢跳舞好叻 o架！
羅仲謙︰梗係黃智雯啦，其他都冇合作過。
http://bbs.ent.163.com/bbs/tvb/198465845.html
沒有留言:
張貼留言