KKground... ......................... . 搜尋文章請按首頁左上角...................................................................................................@留言請按我@

2011年2月2日 星期三

[昔日] [東周刊第278期] 腦袋太忙 精子太閒 黎耀祥

2008-12-29



訪問黎耀祥,通常「買一送一」,太太Julia總是陪伴他到來,打點一切。
結婚十二年,她看着祥仔時,仍然充滿愛意,笑言:「因為我太鍾意佢!」

有溫婉嬌妻,兒子正橋又聰明乖巧,祥仔更由綠葉榮升主角,生活美滿。

無奈歲月的塵沙,滾滾撲面,四十四歲的祥仔說:「中年是一切都不能有太大轉變,慢慢走入死角,不會有太大發展,樣樣嘢都定晒,男女關係都定埋,除非好似倪震咁,四十幾歲仲有咁多女朋友。人好需要肯定自己,尤其是中年。」

掛上好老公的標籤,誘惑更大。

「有啲做呢行嘅,佢又唔mind(介意)你結咗婚,問題係你行唔行埋落去

人到中年,不是腦袋太忙,精子太閒;就是精子太忙,腦袋太閒。

倪震應該是後者,而祥仔則謂:「我努力控制緊啲荷爾蒙!」


祥仔的妻子Julia,為他拍下訪問的花絮。


祥仔結領帶時,妻子幫他整理,照顧得他妥妥貼貼。

平凡已是悲劇

黎耀祥在妻子Julia接載下到來做訪問,他先到場,Julia泊好車,為他到銀行入數後才現身。結婚十二年來,差不多每個訪問、每次登台,Julia都陪伴祥仔左右。他喝光了茶,即為他斟添。他穿恤衫,便為他整理衣領。

祥仔人生最大的成就,可能是有一個好老婆。

「太太可能都未滿意,我未達到她的理想,但我又覺得盡了力,點為之多,點為之少,好難有一個共識。」

他生性悲觀,全靠樂觀的太太支持。

「我十幾歲就追求人生意義,追求意義本身已是悲劇。我又長得平凡,平凡亦是悲劇,因為不夠精采。有她在我身邊,令我比較平衡,我很多謝她!」

近年事業愈見起色,但人到中年,祥仔又有一番感慨。

「對自己存在價值有質疑,體能開始衰退,有啲嘢又唔到你。後生仲話有時間,家計吓條數,中年喇,冇囉喎,若一個唔好彩,人生已過三分二。

「好多嘢已有定局,點去變,點去行呢,中年最大鑊係企咗喺度。這種感覺家都有,雖然今年事業發展比較好,但你話好大突破咩?又不是。我這種演員,太平實、太普通,並非劉德華那種,一爆就爆咗出來。」


祥仔十分疼愛兒子正橋,常跟他「拍拖」,一起踏單車和游泳。


得到無綫最佳男配角獎時,祥仔指李司棋在他耳邊說:「這是你應得的!」讓他很感動。

好男人都會滾

黎耀祥說,男人年紀漸長,會靠結識異性來證明自己,倪震便是最佳例子。

「係咪好男人就唔去滾,好難講,在我個世界事情無分對錯。你要明白上天作弄人,兩性關係是其一,情慾最玩人。性看似好美麗,透過性可以生兒育女,但性的另一方面亦好黑暗,可以家破人亡。可能有一刻受荷爾蒙影響,或是有個老友叫你落夜總會,人未能完全控制自己的情緒,否則就冇罪案啦。所有嚴重錯誤,都是一剎那的衝動。所有嘢都喺身邊,睇你有冇行埋嗰一步。」

祥仔直認曾面對誘惑。

「『祥仔,傾吓偈啦!』、『祥仔,好鍾意睇你做戲呀!』,呢啲絕對有。你好明白對方動機,行多一步咋,識多個女仔。去到家,OK啦,叫做控制到。大家都話我係好老公,我盡力去做,唔肯定將來完全控制到。」

他說男人最感慨的,是驀然回首,才發現自己揀錯了。

「畀你揀嘅時候,你唔識揀;到識揀嘅時候,已經冇得揀。驀然回首,發現身邊嗰個係唔啱嘅,都冇用啦,揀咗喇!好彩我嗰個都OK。」

犯錯為尋開心

當了綠葉多年,祥仔今年總算當上主角,又得到無綫的最佳男配角獎。

「攞個獎係好,但實際上又有幾好呢?今次攞獎,對我唔重要,對我身邊的人反而好重要。因為人需要知道努力有回報,令大家冇咁灰。」

他說現在是收成期,妻賢子孝,事業有較大發展,是最滿足和幸福的階段。

「我入行時諗住自己會踎街,但條路都唔難行,因為我從來冇抱有希望。以為自己只能當一個做極都做唔起嘅演員,沒想過會有這樣的運氣。現在都辛苦嘅,收割要彎腰,但辛苦得來有收穫。近年又沙士又金融風暴,原來人生可以好大鑊,去到咁仲想點,若仲話不足,好對唔住上天。

「人生為咗乜呢?每日營營役役,為開心啫。你見咁多人偷歡,不斷犯咁多錯,最終都是想開心。但原來開心不能亂追求,首先要搵番乜嘢叫開心,否則會追逐錯的。」


去年舉家到上海旅行,兒子正橋是祥仔和Julia的混合體。



我們仨

黎耀祥愛畫畫,會跟兒子正橋一起畫生日卡給太太Julia。

這幅一家三口的郊遊圖,正是他們的生活寫照。

「兒子十一歲了,過多幾年便十八歲,快長大成人了。」

祥仔記得兒子升讀小學的第一天,混在一堆嘰嘰喳喳的小學生裏,慢慢走進校園時,不斷回頭。祥仔看着他的背影消失在大閘後,對着背影既欣喜又悲傷。

「人生無不散之筵席,將來他走不走,個心喺唔喺度,對我兩夫婦來說不重要,最重要是現在。」

在這一生中,他知道自己將會一次又一次看着兒子離開。

他想追回擁抱,但又不敢張聲。

就像兒子踏單車愈走愈遠,頭也不回地勇闖新世界,夫婦倆默默地追隨着他的背影。

「就算將來他有自己的世界,仍是每天在照亮我的生命。」

http://www.eastweek.com.hk/index.php?aid=280&highlight=%E9%BB%8E%E8%80%80%E7%A5%A5

沒有留言:

張貼留言