KKground... ......................... . 搜尋文章請按首頁左上角...................................................................................................@留言請按我@

2011年12月15日 星期四

[新聞] 黃金視窗:阿佘友共情欺與詐

【打開天與地】破冰而出的無綫年度推薦劇《天與地》,評論聲音極端,有人讚嘆、有人討厭。飾演女主角葉梓恩的佘詩曼日前坦言:「呢類人性嘅故事代表咗好多人嘅心聲,我覺得今次想吸納嘅觀眾未必係大眾化,唔係一般爸爸媽媽會欣賞嘅戲。」提到與男主角的那些年情懷,阿佘說:「知道佢哋冇帶家明返嚟,會對佢哋體諒,點知當我接受咗,先畀我發現原來係佢哋曾經傷害家明。」撰文:何慧斯

熱爆討論區的無綫年度推薦劇《天與地》,佘詩曼飾演葉梓恩一角,獲知音讚賞,有人覺得角色為阿佘度身訂做,有人覺得她脫胎換骨,對於網民的讚賞,阿佘日前在將軍澳接受訪問時說:「可能今次角色係一個幾唔同嘅,以前未演過,又唔可以太表面,亦唔係嗰種第一日埋位就咁拍到。」


雖然阿佘已向外闖返內地搵人仔,但依然落力宣傳主演的無綫劇《天與地》。攝影:林德雄

佘詩曼在劇中跟幾位男主角皆有感情線,錯綜複雜。


 
 
 
 
 
 
 
 
 
 
 
 
 
 
 

阿佘表示雪山四少年中,她當然最愛家明(右)。
 
 
 
 
 
 
 
 
 
 
 
 
 
 
 
 
 
 




做足功課易投入
阿佘續說:「我接完呢部戲就返咗夏威夷休息,一個月之後先開工,喺假期裏面,雖則仲未有劇本,但係我已經成日喺度幻想,又寫咗好多關於我嘅自傳畀自己。」問起當中的原因,阿佘坦言:「因為今次太過深層,梓恩背負嘅嘢實在太多,嗰陣仲未有電話亭、電單車呢啲畫面寫出嚟,所以我要不停咁同自己講,要先自己鑽咗入去件事,亦要靠幻想我同家明有幾咁開心,我哋三個人嘅關係有幾咁好,家明嘅死對我有幾大打擊。當時我只係得 10幾歲,一個 10幾歲嘅人可以承受到幾大打擊,我有幾咁嬲佢哋三個人,寫咗好多好多,不斷喺度諗,因為要個心裏面有嘢,先可以一埋位係嗰個人。」

阿佘透露跟黃智賢車廂中的感情戲,揣摩情感花了不少心機。
















飾演電台 DJ的阿佘,踢爆拍劇時經常飛紙仔,難度增加富挑戰性。

 
 
 
 
 
 
 
 
 
 
 
 
 
 
 




飛紙仔挑戰演技

過程的確很辛苦,不過真的沒有其他辦法,阿佘說:「其實我嗰個月放假真係好唔開心,但係拍阿戚(戚其義)啲嘢預咗係咁。我仲記得呢部劇拍第一日廠,我仲開緊《 72家租客》嘅兩日外景,已經好辛苦,因為《 72》又係飛紙仔,呢部又係飛紙仔,突然間我喺下晝五點入廠,兩點先畀稿我,嗰場戲我喺 DJ房一個人 solo,對白有成 10幾頁紙,好彩早有準備,做定功課,如果唔係一個人都幾難處理。」不過,劇集從上映至今,收視成績一直未算理想,阿佘說:「呢類人性嘅故事代表咗好多人嘅心聲,我覺得今次想吸納嘅觀眾未必係大眾化,唔係一般爸爸媽媽會欣賞嘅戲,但係我好開心 80後識得用心去欣賞,我自己拍嘅時候都預咗好多人會唔明。作為演員,可以遇到一部咁好嘅戲同編劇,係好好彩嘅一件事,我真係演得好過癮。」她續說:「家我會重新去學識投入同抽離一個角色,我曾經試過抽離唔到,嗰陣拍《倚天屠龍記》做周芷若,尾段話佢走火入魔,點知最後反而搞到我晚晚收工都心神不定,抽唔番出嚟,真係好驚,好彩最後冇事。」

揣摩情感難拿揑

不得不提的,當然是阿佘與劇中男友家明、林保怡、陳豪和黃德斌的一段「那些年」的情懷,她說:「如果你問我最愛係邊個,我會話一定係家明,我同佢哋三個係有的微妙關係,最初我係諗人長大咗,想學識包容同寬恕,唔想自己再生活得唔開心,想重新去接受呢班朋友,當時淨係知道佢哋冇帶家明返嚟,都會對佢哋體諒,點知當我接受咗,先畀我發現原來係佢哋曾經傷害家明。」若要細數難忘場面,阿佘直說:「就係開始感覺到佢哋做咗啲對唔住我同家明嘅事,但係我又未肯定,我逐個問佢哋有冇嘢呃住我,我問阿戚情感方面有乜嘢要求,佢話唔使喊,如果喊係好似信佢哋,但係拍嗰陣忍唔住,啲眼淚係咁流,我覺得好心痛、好傷心,對佢哋好失望。」

反覆排戲捉真感情

努力過後,阿佘滿意今次在《天與地》的表現:「呢部戲好有感覺,我都好鍾意。係難度高嘅一次,我都擔心,做得太過平、太過淡又驚冇嗰個效果,但係同呢個組合合作,又唔係要個人突出表現,要喺中間度搵個位係好難。」

「諗唔到點做」

阿佘續說:「我仲記得有場戲講我同阿 Ben(黃智賢)喺車度,佢畀隻結婚戒指我嗰幕,當時我係捉唔到㗎,真係諗唔到點樣做,感情係好淡,但係唔可以唔做。跟住我捉咗周家怡遊車河,坐喺車上佢扮阿 Ben,大家喺度試用邊樣態度好、邊句對白輕重好,家諗番個過程真係幾好玩。」

(蘋果日報)
http://www.ihktv.com/charmaine-bullying-and-fraud-empathy-friends.html

沒有留言:

張貼留言